Meclîsê Federal ê Almanya de seba kesanê ke Qirkerdişê Sêwazî de cuya xo ra bîyê, yadkerdiş ame viraştene. Yadkerdişî de bale ancîyaye faîlan ser o ke bi serran Almanya de serbest gêrayê û rastê ceza nêamê. No derheq de mesajê “Hetê huqûq û sîyasetî ra rolê negatîf ê Almanya ganî bêro teriknayene û parlamento de cipersayîşêk virazîyo” ame dayene.
Semedê serrgêra Qirkerdişê Sêwazî ya 33. Meclîsê Federal ê Almanya de vîrardişêk virazîya. Virardişî de ke bi pêşengîya Parlamenteranê Federalan Sanae Abdî û Hakan Demîrî û Federasyonê Yewîye yê Elewî yê Almanya (AABF) de ame organîzekerdene, bêcezaverdayîşê qirkerdişî û rolê Almanya ser o ame vindertene.
‘Madimak meseleya Almanya ya zî’
Sekreterê Pêroyî yê AABF’yî Ûfûk Çakirî qiseykerdişê xo de bale ante rolê negatîfî yê Almanya ser o û wina va: “Qirkerdişê Madimakî tena meseleya Tirkîya nîya meseleya Almanya ya zî. Çike qirkerdişî ra dima tayê faîlî ameyê Almanya û rastê yew ceza û cipersayîşêk nêyamê. No bes nîyo nînan ra tayînan hemwelatîyîye girewte. No derheq de Almanya berpirsîyarîya xo ya sîyasî û huqûqî nêarda ca.”
Serdar Dogan o ke Madimak de birayê xo kerdbi vindî, ey zî sey keyeyê çi qewimîyayo, çi serê înan ra vîyarto ê pare kerdî. Avukat Şenal Sarihan zî prosesê dewa hetê huqûqî û demê muhakemekerdişî de çi problemî vejîyayê, bêcazemendiş û îhmalan ser o vinderte.
Parlamenteran sozê cipersayîşî da
Parlamenteranê Meclîsê Federalî Sanae Abdî, Hakan Demîr, Macît Karaahmetoglu, Derya Turk-Nachbaur û Serdar Yuksel zî qiseykerdişanê xo de rolê Almanya yonnegatîf û îhmalan ser o vindertî. Parlamenteran sozê teqîpkerdiş, cipersayîşan da.
Programê yadkerdişî bi vengdayîşê hiş ra nêvetişê Qirkerdişê Madimakî û domnayîşê têkoşînê edeletî ame qedênayene.
