Karkerê madenî yê ku seba heqdestê xo çalakî de bî, pîya bi keyeyanê xo ameyî destbendkerdene. 84 karkerê madenî yê ku pîya bi keyeyanê xo vizêr ra nat binê çiman de bî, saetanê şewe de ameyê veradayene.
Karkerê madenî yê girêdayeyê Sendîkaya Madenî ya Xosere yê ke Doruk Madenê Holdîngê SSS a Yildizî û Etî Gumuş Madenê Xarpêtî de xebitîyenî, seba heqdestê xo ameyî Anqara. Karkeranê ke waşt Wezaretê Enerjî û Çimeyanê Xozayî reyde pêvînayîş bikerê, dest bi çalakî kerdbî. Karkerê ke hetê polîsan ra ameyî astengkerdene, 4 rojanê çalakî de, 3 rey ameyî destbendkerdene. Tewr peynî de Serekê Sendîkaya Madenî ya Xosere Gokay Çakir û pisporê rêxistinî Başaran Aksu zî tede 84 karkerî pîya bi keyeyanê xo ameyî destbendkerdene. Teberê Başaran Aksuyî de ke bi manaya “Wezîfedaranê dewlete rê heqaret kerdo” amebî girewtene, pêro karkerî û keyeyî saetanê şewe de ameyî veradayene. Badê veradayîşê karkeran, ê do saete 11:00 de reyna seba pêvînayîşî verê Wezaretê Enerjî û Çimeyanê Xozayî de çalakîya xo bidomnê.
