Pisporê Teknolojîya Madenî û Zanyarîya Erdî Serkan Îçelî, erdlerzê 3,6 û 3,2yî yê ke Çewlîgî de qewimîyayî, înan ser o qisey kerd û cayê ke tede erdlerz pawîyeno îlan kerdî
Çewlîg de ke erdlerzêko gird pawîyeno, vizêr têdima bi erdlerzanê girdîya mîyanêne lerzîya. Erdlerzê ke qewimîyayî Çewlîg de bî sebeb ke merdimi dekewê mîyanê endîşeyan û Pisporê Teknolojîya Madenî û Zanyarîya Erdî Serkan Îçellî, vîdyoyê ke hesabê xo yê medya sosyalî ra weşana, bi ey herêmê ke tede erdlerz pawîyeno îlan kerdî.
Îçelî dîyar kerd ke seba erdlerzanê qijan ê ke fayê Sudugînî ser o qewimîyayê şarî de tersêk virazîyayo û va ke erdlerzê 2003î yê Çewlîgî zî na herême de bîbî, la nika na herême de erdlerzêko gird nêpawîyeno.
“Tewr zaf erdlerzêko 6,5î do bibo”
Îçelî derheqê cayan de ke tede erdlerz pawîyeno, nê melumatî dayî: “Demê ameyoxî de reyaya Qerexoçan-Nazimîye, Sancak Uzunpinarî est a, nê cayan de eşkeno erdlerz bibo. Segmentê Yedîsuyî yê Fayê Anatolîya Vakurî ser o cayêko 25-30 kîlometreyî de tewr zaf erdlerzêko 6,5î eşkeno bibo. Helbet ganî ma hertim goreyê senaryoyê tewr xirabî awanîyanê xo virazê. Ganî ma goreyê senaryoyê tewr xirabî tedbîran bigîrê. Tîya Tirkîya de cayanê tewr zafan ra yew o ke ma tede erdlerz pawenê.”
