Sazgehê Heqanê Merdiman HRANA ya Îranî bîlançoyê 37 rojan ê Îran û Rojhelatê Kurdîstanî eşkera kerd û dîyar kerd ke çalakîyan de 152ê ci gedeyî, 6 hezar û 854 kesî ameyê qetilkerdene.
Ajansê Heqanê Merdiman HRANA’yî dîyar kerd ke qaso ke ameyo dîyarkerdene, 6 hezar û 854 kesî ameyê qetilkerdene û derheqê 11 hezar û 280 hedîseyê mergî zî cipersayîşê înan dewam keno. Ame vatene ke kesê ke ameyê kiştene 152ê ci gedeyî bîyê û tewr kêm 6 hezar û 430 kesî hetê hêzanê rejîmî ra ameyê kiştene.
Goreyê raporî 11 hezar û 21 welatijê sîvîlî birîndar bîyê, 50 hezar û 235 kesî zî ameyê destbenkerdene yan zî îfadeyê înan ameyo girewtene. Mîyanê înan de 106 wendekarî est ê. Sewbîna ame dîyarkerdene ke vîdeoyê “îtîrafî” bi zor ê 303 kesan medyaya dewlete ser o ameyê weşanayene.
Ajansî da zanayene ke vêşîbîyayîşê tedaya vera çalakîyan eşkerayîyê şermezarkerdişê rejîmî yê hetê rêxistinanê komelkî ra yenê dayene zî vêşî bîyê.
Doktorê çiman bale ant korbîyayîşê rîyê guleyan ra û rêxistinê mamosteyan zî kiştişê çalakîkeran û girewtişê înan şermezar kerd.
Raporî de ame dîyarkerdene ke kiştişê gedeyan û ciwanan, vîndîkerdişê bi zor û kerdişê dûrê merdimî yê merkezanê destbendkerdişî nîşaneyê krîzo xorîn ê rayberîya welatî yo.
