Beşdar û delegeyanê Konferansê Huqûqnasan ê Kurd serê statuyê şarê Kurd û rola huqûqî û herîteya raya aştîye de qiseykerd û bine xêz kerd ke amanca înan aya ke ‘Huqûqê Kurdan’ bi rayê ka kolektîfe de bêro naskerdene.
Konferansê Hiqûqnasanê Kurd ê Demokratîk bi sloganê ‘Seba Azadî, Statu û Aştîya Huqûqê Demokratîkî’ Salona Konferansî ya Çand Amedî ya Şaredarîya Bajarê Girdî ê Amedî de amebî viraştiş û di rojî dewam kerd. Konferans hetê Komeleya Hiqûqnasanê Seba Azadîye (OHD) ra amebî rayraberdayene. Konferans de serekê baroyan ê şariştananê Vakurê Kurdîstanî, rayberê dezgehanê huqûq û heqanê merdiman, zaf parêzerî û rayberê DEM Partî yê ke hiqûqnas ê amade bîbî.
Qiseykerdoxanê konferansî huqûqnas û parlamentera DEM Partî ya Şirnexî Newroz Uysal Aslan, Hiqûqnas Veysî Eskî û Hiqûqnas Umut Yilmazî amancê konferansî ajansê ma rê erjnayî.
‘Ma seba awankerdişê warêko huqûqî yo demokratîk xebitîyenê’
Huqûqnas û parlamentera DEM Partî ya Şirnexî Newroz Uysal Aslan ard ziwan ke îno konferans rasterast bi prosesê aştî û gêrayişê statuyê Kurdan ra girêdaye yo û persê ke bîyê sebebê arêbîyayîşê huqûqnasanê Kurdan wina rêz kerdî:
“Statuya Kurdan do çi bo? Şarê Kurd do senî xo miyanê dewlete û komelî de awan bikero? Û sey hiqûqnasanê Kurd, na rewşe de berpirsiyarîya ma çi ya? Ma çi pêşniyar kenê?”
Newroz Uysal bal ante serê muhimîya huqûqî ya nexşeyê rayîrî yê aştîye de û wina va: “Seba ke ewro proses de nîqaşê zaf muhîmî serê qanûn û huqûqî de rayra şonê, ma seba awankerdişê warêko hiqûqî yo demokratîk xebitîyenê.”
‘Ma do rayîrê muzakereyan weş bikerê’
Huqûqnas Veysî Eskî zî qiseykerdişê xo de dîyar kerd ke ê wazenê bi nê konferansî, her di hetî yewbînan ra têduşt bê û bi rehetî bîeşkenê waştenanê xo bîyarê ziwan. Ey nê çîyî ardî ziwan:
“27ê Sibate de vengdayîşêk birêz Ocalanî virazîya ke wa PKK xo fesh bikero û no çarçewe de meclîs de komîsyonêk ame awankerdene û nê komîsyonî raporêk pêşkêş kerd. Dima nê raporî eke qanûnê çarçeweyî bivejîyo û muzakere bi di hetan rayra şiro, lazim yo ke her di hetî zî serê nê qanûnî de fîkranê xo bîyarê ziwan, ma do rayîrê ney weş bikerê.” Veysî Eskî teqez kerd ke meseleya Kurdan tena bi qanûnêk çareser nêbena û armancê înan no yo ke ‘Huqûqê Kurdan bi qaydeyêko kolektîf bêro naskerdene.’
‘Ma wazenê pêvajoyê aştîye bixurtêr bo’
Tewr peynî de Huqûqnas Umut Yilmazî zî dîyar kerd ke nêzdîyê 10 serran o ke serê heme waran de hêrişî est ê û warê huqûqî zî nesîbê xo nê hêrişan ra guret. Ey dîyar kerd ke wazenê warê hiqûqî de tesîrê nê hêrişan çîn bikerê û wina va:
“Ma wazenê hetê huqûqî de seba Kurdan û bedilnayîşê kanûnê bingeyînî encamêk bivejê meydan ke prosesê aştîye û komelo demokratîk hînî bixurt bo.”
