AMED – Endamê Platformê Şîyar Be û Şûbeyê SES’î yê Amedî Psîkolog Recep Orûçî derheqê gamê “Wirzê” de ke vera madeyanê kungkerdişî daye dest pêkerdene, dîyar kerd ke ganî têkoşînê vera madeyanê kungkerdişî tena serê mile yew sazgehe de nêro verdene û vat: “Seba ameyoxî ganî komel, gede û ciwan piştî bide yewbînan û nê problemî bi hawayêko hempar çareser bikerê.”
Platformê Têkoşînê Vera Madeyanê Kungkerdişî Şîyar Be bi sloganê “Vera madeyanê kungkerdişî, seba cuyêka azade û arame wirzênê!” 6ê temmuze de Amed de bi eşkerayîyêk gama “Wirzê” daye dest pêkerdene û vera madeyanê kungkerdişî dest bi çalakîyanê tewir bi tewir kerd. Binê banê platformî de xeylê sazgeh, dezgeh û partîyê sîyasî ke Amed de ca gênê û ê her roje kuçe û taxan de çalakîyanê roniştişî, rayraşîyayîş û eşkerayîyan virazênê û nobete gênê. Nê sazgehanê ke mîyanê Platformê Şîyar Be de ca gênê, înan ra yew zî Şûbeyê Sendîkaya Kedkaranê Weşîye û Xizmetanê Komelkî (SES) yê Amedî ya. Endamê Şûbeyê SES’î yê Amedî Psîkolog Recep Orûçî zî derheqê gama “Wirzê!” û xebatan de ke na çarçewa de yenê kedrene qisey kerd.
Ma dej û jano ke kewto mîyanê komelî vînenê’
Recep Orûçî îfade kerd ke problemê madeyanê kungkerdişî problemêko demderg o û wina qisey kerd: “Ge-ge problemêk, komelî zêde dejneno. Nê serranê peyênan de zî dej û tesîrî nê problemî kewto mîyanê heme komelî. Nê semedî ra ma gamêke daye destpêkerdene. Ma vat ke ma hîşyar bibê vera nê problemî. No problem ewro, tena tesîrê ciwanan û ameyoxê ma nêkeno, eynî wextî de ameyoxê ma zî erzeno tehluke. Ma nê dej û jano ke kewto mîyanê komelî vînenê û ma wazenê vengê xo berz bikerê. Ma destpêke de zî vengê xo berz kerd û ma vat ke no problem tena problemê sazgehêk, partîyêk yan zî kesêk nîyo. No problem, problemê heme komelî yo. Seba ke komel sey xerîta yo, wexto ke na xerîta de rengê her kesî bibo û cayêkê aye bixeripîyo, estetîzmê ê komelî zî xeripîyeno. Demêko derg o ke raşta zî na xerîta û awanîya komelî xeripnaya.”
‘Têgêrayîş û zîhnîyetêk bi rayîrê çalakîyan yenê awankerdene’
Recep Orûçî dîyar kerd ke meseleyê fihûş û madeyanê kungkerdişî tena berpirsîyarîya kesêk, sazgehêk yan zî partîyêk nîyo, ganî endamê komelî pêro pîya vera nê meseleyan de vindero û wina vat: “Coka ma vat ke cayo ke madeyê kungkerdişî bibo, ma şinê uca û xover danê. Aye ra tena bi qiseykerdişî nê meseleyî çareser nêbenê. Raşta zî ma wazenê her wext nê meseleyan ser o qisey bikerê, tena bi qiseykerdişî nê ganî ma gamanê şênberan zî bierzê. Nê çalakî û gamê ke ma eştê zî na çarçewa de dewam kenê. Nê çalakîyê ke ma virazenê, tena çalakîyê asan nîyê, têgêrayîş û zîhnîyetêk rayîrê nê çalakîyan yenê awankerdene. Awanîyê ke nênê xebitnayene û veng mendê, yenê pakkerdiş, cayê ke roşnî nîyê yenê roşnîkerdiş û parkê ke ewle nîyê yenê ewlekerdene. Nê xebatî, na çarçewa de dewam kenê. Barê nê meseleyan tena qiseykerdiş nîyo, gamê pratîkî zî yenê eştene.”
‘Ganî ma problemî bi hawayêko hempar çareser bikerê’
Recep Orûçî dîyar kerd ke no problem bi çareserkerdişê şexsî nêqedîyenê û qiseykerdişê xo wina qedêna: “No problem, problemêko komelkî yo. Ma senî eşkenê komelî bidê xebitnayîş û înan zî meylê xirabî ra rizgar bikerê? Coka ma çiqas qedexeyan bîyarê yan zor bidê zî, no problem bi hawayêko sîstematîk çareser nêbeno. Ma eşkenê rexneyanê xo bikerê, la ganî ma mîyanî komelî de nê rengî newe bikerê û rengê merde û pelisîyayî bivurnê. Nê semedî ra vengdayîşê ma o yo ke ma nê problemî tena serê mile kesêk yan zî sazgehêk ser o nêverdê. No mesele, meseleyêko muhîm o û gird o. Seba ameyoxî ganî komel, gede û ciwan piştî bidê yewbînan û nê problemî bi hawayêko hempar çareser bikerê.”
