Heyetê DEM Partî yê Îmraliyî ra Pervîn Buldan dîyar kerd ke proses resayo astêk û vat: “Asta ke ma tede yê, tede awankerdişê komîsyonî û Meclîs de amadekerdişê qanûnan est o.”
Heyetê DEM Partî yê Îmraliyî û Serekê Pêroyî yê Partîya Gelecekî Ahmet Davutogluyî Merkezê Pêroyî yê Partîya Gelecekî de pêvînayîş kerd. Pêvînayîşî ra pey çapemenî rê eşkerayî ameye dayene.
Davutoglu destpêkî de qisey kerd û dîyar kerd ke derheqê awankerdişê komîsyonê Meclîsî înan fikrê xo pare kerdê û vat: “Ma prosesêko winasîn de yê ke ganî her kes b baldarî têgêro. Faktorê psîkolojîkî nê prosesî de xeylî tesîrdar ê. Bi rayîrê empatîyî ganî ziwanêko baldar bêro şuxulnayene ke peynîya fikaranê komelî rê bêra. Ma hêvîdar ê ke no proses do serkewo, ma do pîya bivînê û wayîrê ê îmkanî bibê ke qedînayîşê nê problemî girdî de bibê hetkar.”
Pervîn Buldan: Proses qonaxêk de dewam keno
Pervîn Buldan vat: “Ma pêvînayîşêko muhîm kerd. Nêzdîyê saetêk o ma tîya de yê. Ma asta ke ma nika tede yê birêz Davutoglu rê behs kerd. Seba ma xeylê muhîm o ke tecrubeyanê verînan ê birêz Davutoglu ra îstîfade bikerêç Demo vîyarte muhîm o.
Proses astêk de dewam keno. Yeno zanayene ke do Meclîs de komîsyonêk awan bibo. Tena 2 yan zî 3 partîyî nê, paştîya heme partîyanê muxalefetî do hetkarîyêka pîle prosesî rê bikera. Nê semedî ra do pêvînayîşê ma do dewam bikerê.”
Mîthat Sancar: Paştîyêka hîra ya komelkî lazim a
Mîthat Sancarî vat: “Seba ke no proses bi rengêko xurt û baş aver şêro, paştîyêka hîra ya komelkî lazim a. Her ke paştîya komelî vêş biba, o wext do îmkanê ma seba serkewtişî vêş bibê, nêke do mimkin nêbo.”
Persê rojnamgerêkê ser o ke vat, ‘do AKP reyde pêvînayîş bêro kerdene yan na’ Sancarî vat, ‘Nika ma do Birêz Bahçelî reyde pêvînayîş bikerê, siba zî ma do Serekê Pêroyî yê CHP’yî Ozgur Ozelî reyde bêrê têhet.”
Qonaxo nikayîn qonaxê komîsyon û qanûnan o
Pervîn Buldan zî cewab da persê rojnamegerêk û vat, “Proseso nika ra pey prosesêko winasîn o ke Meclîs de do komîsyon bêro awankerdene, qanûnê azadîye û entegrasyono demokratîk ê komîsyonî do vejîyê û qonax temam bibo. Dima ke nê qonaxî heme temam bîyê, bêguman do proses vîyaro qonaxêko newe û ma do reyna raya pêroyî reyde pare bikerê. La qonaxo nikayîn Meclîs de awankerdişê komîsyonî û vetişê qanûnan o.”
