AMED – Endamê Amargî Murat Sonmezî eşkera kerd ke meqsedê înan vera sîyasetê bêvîrrakerdişî ke ewro ciwanan ser ro yeno viraştiş û veng da pêro ciwanan ke dormeyê kultur û hûnerî de kom bibê.
Komeleya Kultur û Hunerî ya Amargî 25ê nîsane de ameye ronayene. Komeleya Ciwanan roja akerdişî ra heta ewro xebatanê xo dana domkerdene. Amargî ewilî xebetanê xo de ciwanan reyde amey têhet dima ra dest bi kursan kerd. Ewro 4 beşan de kursê înan est ê. Mîyanê nê 4 kursan dê erbane, saz, kayê şarî û ziwanî est ê. Serê xebat û tewir biyayişê ciwanan yê kursan de ma endamê Amargî Murat Sonmezî de qisey kerd.
Murat Sonmezî derheqê xebat û atolyeyanê xo yê neweyan de qisey kerd û vat: “Nêweşîya nê çaxî, vera sîyasetê bêvîrrkerdiş ke ciwanan sero yeno kerdene. No ferzkerdiş beno sebebê neslanê winayîna ke kodanê xo yê kulturî nêzanê û bêkulturî sey kulturêk ciwîyenê û ciwanî bêhiş benê.
Seba ciwanan warêko azad
Murat Sonmezî qiseykerdişê xo de wina vat: “Ronayîşê Komela seba ciwanan erdê cuyêka ke ti tede eşkenî xo bi hawayêko azad îfade bikerî û serê huner, kultur û ziwanî reyde bêrî pêser. Bi nê waştişi zî, seba ciwanan yew qade akerê ke tede bieşkê hûneranê xo aver berê, pîya bêrê pêser û qîymetanê xo yê kulturî biwanê û bizanê.”
200 ciwanî atolyeyan de hetkarî gênê
Murat Sonmezî derheqê fealîyetanê xo de roja akerdişî ra heta nika nê agahî dayê: “Ma kursê erbane, saz, kayanê şarî û ziwanî akerd. Atolyeyanê ma de nêzdîyê 200 ciwanî est ê. Nê xebatî do nêzdîyê 6 aşmî biramê û badê 6 aşmî qeydê kursanê ma do biqedîyê. Ma xebatê kulturî, pîyavaj û xebatê cîya-cîya ke ciwanan anê pêser amade kerdê. Her roje ke vîyarena ma fealîyetanê xo aver benê û seba ke ma biresnê hîna zaf embazanê ciwanan xebate kenê.”
‘Eleqeyê ciwanan ma şa keno’
Murat Sonmezî da zanayene ke eleqeyê seba kursan zaf baş a û wina vat: “Taybetî tewrbîyayîşo xurt yê ciwanan ma zaf şa keno. Kursê ma bi şekleko serûber dewam kenê. Pawitişê ma no yo ke no eleqe hîna zaf bibo û dewam bikero. Ma pêro ciwanan dawet kenê ke kultur û hûnerî reyde bêrê têhet. Bêrê ma pîya bîmûsê, pîya bifikirîyê û qîymetanê xo yê kulturî pîya bivînê.”
Seba ameyoxê ciwanan vengdayîş
Mursat Sonmezî vengdayîşê ciwanan kerd û wina vat: “Merkezê Kultur û Hunerî yê Ciwanan yew nuqtaya pêserameyîşî ya tede her kes eşkeno xo ra çîyêk bivîno. Na xebate gird û muhîma ke ma waşt nê warî de pêserameyîş û pîyabîyayîşê ciwanan xurt bikerê. ma wazenê cuya komelî de ciwanî bibê wayîrê îradeyî û problemanê xo bi xo çareser bikerê. Ma her kesî dawet kenê ke pêro pîya dormeyê kultur û hunerî de torrêka bihêze virazê.”
