Serekê Pêroyî yê DÎSK Basin-Îşî Turgut Dedeoglu û Serekê Pêroyî yê TGSyî Gokhan Durmuşî vat ke astengkerdişê keyepelan, hewanayîşê xeberan û sînordarkerdişê hesaban êdî bîyo problemêko sîstematîk.
Tirkîya de tedayê medyaya dîjîtale ser o her roje zêde benê. Aşma tebaxe de hesabê Xî yê JINNEWS, MedyaHaber, Ajansa Mezopotamya û tayê rojnamegeran ameyî astengkerdene. 25ê êlule de zî, ajansa ma zî mîyan de, tewr kêmî 250 keyepel û hesabî ameyî astengkerdene.
Turgut Dedeogluyî vat ke nê astengkerdişî êdî tatbîqatê yewkesî nîyê. Goreyê ey, nê astengkerdişî bîyê problemêko sîstematîk ke rasterast heqê agahîye û heqê xeberdayîşê rojnamegeran ser o tesîr keno: “Rojnamegerî karêk nîyo ke goreyê destûrê îqtîdarî bêro kerdene. Wexto ke xeberêk yena astengkerdene, tena wendişê aye ney, munaqeşekerdişê aye zî yeno astengkerdene û komel raştîye ra dûrî keweno.”
Dedeogluyî waşt ke vera sansûro keyfî mekanîzmayê huqûqî û demokratîkî xurt bibê. Ey waşt ke sendîka, rêxistinê meslekî, dezgehê medya û rêxistinê huqûqî zî pîya hereket bikerê: “Têkoşînê vera sansûrî tena têkoşînê rojnamegeran nîyo; têkoşîno hempar ê heme kesan o ke wazenê biresê raştîye.”
Gokhan Durmuşî vat ke 24 serrî yo AKP Tirkîya îdare keno û mekanîzmayê dewlete û AKPyî bîyê yew: “Azadîya çapemenîye heqo tewr bingeyin o. Her ke menfeetê îqtîdarî bi nê heq û azadîyan reyde pê nêgênê, tedayê azadîya çapemenîye ser o zêde benê.”
Durmuşî dîyar kerd: “Heta ke têkoşînê demokrasîye xurt nêbo, sansûr û teda çapemenîye ser o do dewam bikerê. Astengkerdişê keyepel û hesaban mudaxeleyêko bêqanûnî yo ke heqê şarî yê agahîye ser o yeno kerdene.”
