Şorişgêra enternasyonalîste Dîana Montseny derheqê hêrişê hemverê Vakur û Rojhelatê Sûrîye de ajansa JINNEWS’ê rê qisey kerd û vat “Kobanê nimûneyê destkewtişê şarê Kurdî yo. Yê ke uca de xo ver danê est ê. Ma zî tîya paştî danê xoverdayîşê înan.”
Kewtişê hukmatê Şamî reyde, Tirkîya hawirê kaosî yê ameyê awankerdiş de feyde girewt û hemverê Vakur û Rojhelatê Sûrîye de hêrişî dayî destpêkerdiş. Tirkîya sewqîyatê leşkerî yê semedê sînorê Kobanê da destpêkerdiş û bêvengîya rayaumûmî zî dewam kena.
Katalan zî ke Spanya de sey Kurdan ke Vakur û Rojhelatê Sûrîye sîstemêk xoser awan kerdî, têkoşînêk xoser kenê. Înan ra yew zî Katalonya de têkoşînê ziwan û nasnameyî dana cinîya bi nameyê Dîana Montseny a. Dîana Montseny heta 2014ine têgêrayîşê femînîst de ca girewta. Serra 2014ine de Şorişê Rojawanî ke bi serkêşîya cinîyan ame destpêkerdiş nas kerd. Dîana ke prosesê Şorişê Rojawanî de ca girewte, pêwa têkoşînê cinîyan, têkoşînê azadî û demokrasî yê şaran de zî ca girewte.
Dîana Montseny ke semedê Şorişê Rojawanî xebatê dîplomasî kena, tehdîdê Tirkîya yê hemverê Vakur û Rojhelatê Sûrîye û ganî enternasyonalîst çi bikerê ser o JINNEWSî rê qisey kerd.
‘O yo ke hedef yeno girewtiş modelê cuya newe yo’
Dîana Montseny vat, aye her kesê ke Vakur û Rojhelatê Sûrîye de xo ver danê silam kena û wina vat: Hêrişê Tirkîya yê hemverê Rojawanî babeta asayîşî nîya, ya îşxalkerdişî ya. Tirkîya bi nê hêrişan wazena ke xerîtaya rayîranê xo pîl bikera. Senî ke Girê Spî, Serêkanî û Efrîn îşxal kerd nika wazena reyna wina bikera. Modelê cuya newe yê bi serkêşîya Kurdan Rojava de ameyo awankerdiş, hedef gêna.
Ruhê Kobanê
Dîana Montseny dewam de wina vat “Semedê nê sîstemî, xeylêk bedelî dîyayî. Şehîdê ma yê enternasyonalîstî est bî. Ma prosesê Kobanê de dî, şehîd bîyî. Wazenê bi hêrişanê winasînan mesajêk bidê ma enternasyonalîstan. La nika ma têkoşîno ke yeno kerdiş vînenê. Senî ke serra 2014ine de xoverdayîşê Kobanê reyde cewabê xo girewt, do reyna bi eynî hawayî cewabê xo bigêrê. Kobanê sembolê destkewtişê şarê Kurdî yo. Tirkîya wazena hêvîya ma bişikina, yê ke uca de xo ver danê est ê û ma do uca de zî paştî bidê xoverdayîşê înan. Ganî hemverê hêrişê Tirkîya vengêko hempar bêro berzkerdiş. Ganî ruhê Kobanê newe ra vejîyo werte.”
‘Ma tîya yê’
Dîana Montseny bêvengîya dezgehê mîyanneteweyî yê hemverê hêrişan de zî rexne kerd û vat “Sîstemo kapîtalîst, sîstemo ke Vakur û Rojhelatê Sûrîye de ameyo awankerdiş ra terseno. Semedo ke terseno no sîstem dinya rê vila bibo. Vengdayişê mi semedê pêro enternasyonalîstan rê no yo. Bêrê ma vejîyê kuçeyan û vengê Rojavayî bidê eşnawitiş. Şima eşkenê şêrê wareyan û hetkarîya Heyva-Sor bikerê. Ez ê kesan ra vana ke uca de xo ver danê, ma sey enternasyonalîstî her tim tîya yê. Semedo ke ma vînenê ke nika rewşe senîn a.”
