Ciwanê bi nameyê Mert Açan u Semîh Açan ke birayê yewbînan bî û keyeyê xo ra ameybî seyranê qeaxê Gola Wanî, gola de xeneqîyayê.
Ciwanê bi nameyê Mert Açan (22) û Semîh Açan (18) ke birayê yewbînan bî û keyeyê xo ra ameybî pîknîk qeraxê Gola Wanî, gola de xeneqîyayê. Keyeyê Açanî semedê pîknîkî ewro şefeq de ameyî qeraxê Gola Wanî ke dewa Amîkî ya qezaya Tûşbaya Wanî de ya. Her di birayê ke semedê honikbîyayîşî kewtî gole, nişka va verê çîman ra bîyî vîndî. Piyê înan Samî Açan ke şi hawarê domananê xo, nêeşka înan bixelesno. Ame zanayene ke her di birayan zî asneberî nêzanayene. Hemwelatîyê dorûverî hawara keyeyî ser vazdayê û Samî Açan û her di lajê ey awe ra vetî.
Netîceyê mudaxeleyê hemwelatîyan de Samî Açan ame ra xo ser. Hemwelatîyan xebere da tîmanê weşîye, AFAD û cendirmeyan û ekîbî sewqê cayê hedîse bîyî. Ekîbanê weşîye mudaxeleyê her di birayan kerd la tu netîce nêame girewtene û ame zanayene ke her di birayî xeneqîyayê.
Ekîbanê weşîye bi ambulanse her di cenazayî berdî Merkezê Tibî yê Dursun Odabaşi yê Unîversîteya Yuzuncu Yilî yê Wanî.
