Dewa Dêrsimî Xecerîye de vera projeya Santralê Enerjîyê Tîje (GES) dewijan reaksîyonê xo nîşan da û vat ke: “Ma nê santralî nêwazenîme. Eke no santral virazîyo merayê ma nê manenê. Ma se hardê xo ramenîme se heywananê xo kenîme weyî.”
Dewa Xecerîye de ke girêdayeyê merkezê Dêrsimî bi destê şîrketa ‘Buyukdere Elektrîk Uretîm Depolama Tîcaret Anonîm Şîrketî’ yeno waştene ke serê 96 hektarî cayî de tesîsê depoyê santralê enerjîyê tîje bêro viraştene. No derheq de mabênê rêveberanê şîrkete û dewijan de yew kombîyayîş virazîya.
Dewijan nêrazîbîyayena xo nîşan da û va: “Ma nê santralî nêwazenîme. Eke no santral virazîyo merayê ma nê manenê. Ma se hardê xo ramenîme se heywananê xo kenîme weyî.”
‘Ma na pirojeye nêwazenîme’
Muxtarê dewa Çuxure Hakkî Gulî û dewij Alî Aktaşî ajansê marê qisey kerd û nêrazîbîyayena xo nîşan dê. Muxtarî wina va: “Ma mêşan kenîme weyî, malî kenîme weyî, dawarî kenîme weyî. Ma weşîya xo nîya ramenîme. Zirarê xo marê esto. Yenê îta serê merayê ma ca virazenê ma na pirojeye nêwazenîme.”
Alî Aktaş zî reaksîyonê xo wina nîşan dano: “Ma na projeye nê vazenîme. Dewa ma hukmatî 25 serrî nayera ver kerde tal. Nîka kî dewijê ma cîranê ma peyser amê dewane xo. Na defa kî projeyê ceyranî anê virazenê. Ma meşan kenîme weyî, heywanan kenîme weyî, hêgayanê xo ramenîme îdarê ma serê naye o. Qomê ma, dewicê ma kes na projeye nêwazeno. Awê ma cayo ke na projeye virazîna uca ra yenê, heybanê uca de çereno. Ma dewijî pêro nêwazenîme.”
