Serdozgerîya Cumhuriyetî ya Kocaelî derheqê terefgiranê Kocaelîsporî yê ke maçê Amedsporî de “torbeyê zerdî” nîşan dabî de cipersayîş da dest pêkerdene.
Hewteya 2. ya Lîgê Superî de vizêr şande Amedspor û Kocaelîspor Statê Kocaelî de ameyî hemverê yewbînî, tayê terefgiranê Kocaelîsporî trîbunan de “torbeyê zerdî” berz kerdî û nîşanê terefgiran ê Amedsporî dayê. Terefgiranê Kocaelî bi nê “torbeyê zerdî” terefgirê Amedsporî tehdîd kerdî. No serê medya dîjîtal de rastê nêrazîbîyayîşî û hêrsê terefgiranê Amedsporî ame.
Buroya Resnayîşê Medya ya Serdozgerîya Cumhurîyetî ya Kocaelî eşkerakerdişêk vila kerd û derheqê terefgiranê ke “torbeyê zerdî” nîşan dabî de cipersayîş da dest pêkerdene. Serdozgerîye dîyar kerd ke derheqê 5 kesanê ke ameyê tespît kerdene de qerarê destbendkerdişî ameyo dayene.
