SPKyî qerar da ke derheqê 38 kesan û Pusula Portfoy Yonetimi A.Ş. de Borsaya Îstanbulî û bazaranê bînan ê rêxistinbîyayeyan de qedexeyê muamelekerdişî yê 2 serran bêro tatbîqkerdene.
Konseya Bazarê Sermîyanî (SPK) bultenê xo yo hewteyî weşana. Goreyê bultenî, Konseye zêdekerdişê sermîyanî yo bêbedel ê Akfen Yenilenebilir Enerji A.Ş. yê 5 mîlyar û 985 mîlyon lîrayan tesdîq kerd. Konsey destûr da muracatanê îhracê hacetanê deynî yê Fair Finansman A.Ş. (410 mîlyon lîra), Shell & Turcas Petrol A.Ş. (9 mîlyar lîra), Ulusal Faktoring A.Ş. (1,62 mîlyar lîra), QNB Finansal Kiralama A.Ş. (6,5 mîlyar lîra), Fiba Faktoring A.Ş. (1 mîlyar û 116 mîlyon lîra), Trive Yatırım Menkul Değerler A.Ş. (330 mîlyon lîra) û Alternatifbank A.Ş. (500 mîlyon dolar).
Îxbarê sûcî
Konsey netîceyê cigêrayîşê derheqê Katilimevim Tasarruf Finansman A.Ş. (KTLEV) û Gundogdu Gida Sut Urunleri Sanayi ve Diş Ticaret A.Ş. (GUNDG) de qerar da ke derheqê 37 kesan de îxbarê sûcî bêro kerdene; netîceyê cigêrayîşê derheqê Destek Finans Faktoring A.Ş. (DSTKF) de zî derheqê kesêkê bînî de îxbarê sûcî yeno kerdene. Ame zanayene ke îxbarê sûcî çarçewaya sûcê “sextekarîya bazarî ya bingeyê muameleyî” de yenê kerdene.
SPKyî qerar da ke derheqê 38 kesan de ke berpirsîyarîya înan a muameleyanê bazarê paran ê Katilimevim, Gundogdu Gida û Destek Finans Faktoring A.Ş. est a û Pusula Portfoy Yonetimi A.Ş. de Borsaya Îstanbulî û bazaranê bînan ê rêxistinbîyayeyan de qedexeyê muamelekerdişî yê 2 serran bêro tatbîqkerdene.
Qerarê astengê resayîşî
Konsey çarçewaya madeyê yewinî yê Qanûnê SPKyî de seba pawitişê heq û menfeetanê sermîyankaran û astengkerdişê fealîyetê bêdestûrî yê bazaranê sermîyanî qerar da ke resayîşê 5 keyepelanê înternetî bêro astengkerdene.
