Çewlîg de bado ke ciwanêk pê hêrişê çekdarî ame qetilkerdene, Platformê Dezgehanê Demokratîkî eşkerayîye daye û veng da wa vera narkotîk û çekgirewtişê ferdkî tedbîrî bêrê girewtene.
Çewlîg de 3ê çeleyî de ciwano 27 serre H.O. hêrişê çekdarî de dinyaya xo bedilnaye. Platformê Dezgehanê Demokratîkî yê Çewlîgî derheqê babete de Meydanê Kentî de eşkerayîye daye û bale ante ser ke no ciwan netîceya bajar de vilabîyayîşê narkotîk û çekgirewtişê ferdkî de ame qetilkerdene û waşt vera nînan tedbîrî bêrê girewene.
Eşkerayîye hetê Hemserekê DBP’yî yê Bajarî Sevket Kalindamarî ra ame wendene. Eşkerayîye de wina ame vatene: “Na serebûta munferîte nîya, bajar de narkotîk û çekgirewtişo ferdkî bi zanayîşî yeno girdkerdene. Selahîyetdarî sey kayî, pê çend kontrolan cedh kenê ke şarî bixapînê û berpirsîyarîya biremê.
Çîyê ke qewimîyenê rijnayîşêkê komelkî yî giranî mojnenê ra. Sebebê nê îqtîdaro sîyasî yo. Cuya merdiman rîyê menfeatanê sîyasîyî ra yena bêerjkerdene. Ma do teslîmê nê mebê. No komel do hinî bêveng nêmano. Bêvengîye hemkarîya nê sûcî ya. No têna sûcê îdarekaran nîyo, ê ke vera nêkerdişan bêveng manenê ê zî sûcdar ê. Heta ke ciwanan rê hêvî, cuye û ameyox nêro qîmkerdene şîdet do dewam bikero.”
Platformî vat heta ke vera narkotîk û çekgirewtîşî tedbîrî nêrê girewtene do nêvindê û têkoşînê xo bidomnê.
