Medreseya Meydanî ya Colemêrgî ya ke serranê 1700î de hetê Mîrê Hekkarî Îzzeddîn Begî ra ameya viraştene, wextê xo de tena cayêko dînî nê eynî wextî de cayê perwerde, zanist, felsefe û edebîyatî bîye.
Medreseya Meydanî, berhemanê tarîxî yê tewr gird ê Colemêrgî ra yew a. Na medrese hem hetê mîmarî hem zî hetê kulturî ra wayîrê erjêko pîl a û şaristanê Colemêrgî xemilnena. Medreseya Meydanî serranê 1700-1701î de ameye awankerdiş. No berhem hetê Îzzeddîn Begî (Îzzeddînê lajê Brahîm Begî) ra ameyo viraştene ke ê serran de Mîrê Hekkarî bi.
Tena cayêko dînî nê, merkezê zanist û felsefeyî bîye
Medrese bi mîmarîya xo ya hewşê diqatî û bi viraştişê kerrayanê sîyayan, nimûneyanê tewr weş ê mîmarîya Îslam û Kurdî yê wextê mîrekîyan mojnena. Wextê xo de na medrese tena sey cayêko dînî nêameyenê vînayîş, a bîbî merkezê perwerde, zanist, felsefe û edebîyatî ke zaf zanyar û wendekarî tede pîl bîyê. Na medrese sey şahidêko gandar ê tarîx û îqtîdarê Mîrektîya Hekkarî yena qebulkerdiş û nasnameyê şaristanî yo verên pawena.
Ameye restorekerdiş
Medreseya Meydanî mîyanê serran de ver bi xirabbîyayîşî şîyênê, labelê mabênê serranê 2020-2022î de hetê Wezaretê Kultur û Tûrîzmî û Unîversîteya Colemêrgî ra ameye restorekerdiş. Medrese nika sey “Merkezê Kultur û Muzexaneyê Etnografîk ê Colemêrgî” yena xebitnayîş.
Berhemê kulturî yenê mojnayîş
Zereyê Medreseya Meydanî de berhemê kulturî yê herême, kincê kurdî yê tradîsyonelî, amûrê verênî û nimûneyê cuya rojane yê Colemêrgî yenê mojnayîş. Awanî seba şar û tûrîstan akerde ya û şaristan de ê cayan ra yew a ke tewr zaf yena zîyaretkerdiş.
