Muhendîsê Dorûverî yê Berzî Canfîdal Boldaşî da zanayene ke, seba ke derdoranê dişmenanê xozayî rê fersendê rantî bêro afernayîş yan zî polîtîkayanê asayîşî yê şaşan rê ca bêro akerdiş, binê nameyê “ciwankerdişî” de daristanî yenê çinkerdene.
Sekreterê Heyetê Koordînasyonî yê TMMOBî yê Çewlîgî û Muhendîsê Dorûverî yê Berzî Canfîdal Boldaşî, derheqê birnayîşê daran ê dewa Cafranî ya Çewlîgî de eşkerayîyêke da.
‘Hedef de dewa Cafranî esta’
Boldaşî dîyar kerd ke nê wextî de hedefê polîtîkayanê rijnayîşê ekolojîkî de dewa Cafranî ya Çewlîgî esta û wina vat: “Seba ke derdoranê dişmenanê xozayî rê fersendê rantî bêro afernayîş yan zî polîtîkayanê asayîşî yê şaşan rê ca bêro akerdiş, reyna binê nameyê ‘ciwankerdişî’ de daristanê ma yenê çinkerdene!”
‘Seba felaketan dawetîye ya’
Boldaşî eşkerayîya xo de ca da nê îfadeyan û xeterîya rewşe wina ard ziwan: “Awanîya bingeyêne ya ekosîstemî reyde kay beno, daristananê ma reyde pîya gandarê daristanî zî yenê çinkerdene. Herême bêcan yena verdayene. Eynî wextî de dawetîya hedîseyanê xozayî yê giran û xiraban yena kerdene. Bi birnayîşê daran reyde vilabîyayîşê karbonî zêdîyeno, germîye zêdîyena, dengeya buxarbîyayîşî xera bena, rejîmê varanî xera beno û no zî beno sebebê ziwatîye. Nîzamê herikîyayîşê awe yê rûyê erdî xera beno û no zî beno sebebê şewat û lasêran. Nê hedîseyî pêro sey xelekanê zîncîrêkî yewbînan ra girêdayey ê.”
‘Ganî ma xozaya xo bipawê’
Boldaşî peynîya qiseykerdişê xo de banga têkoşînî kerde û wina qedêna: “Ganî ma xoza û bajaranê xo bipawê… Çîyo ke kewno ma mil, seba dinîyayêka hîna weşe, tewr verî vera bêdaristanverdayîşî û polîtîkayanê rijnayîşê ekolojîkî de têkoşîn dayîş o. Ganî îdareyo eleqedar cade na şaşîye ra peyser agêro.”
