Serekê Pêroyî yê PSK’yî Bayram Bozyelî îfade kerd ke seba viraştişê Kongreya Neteweyî verê ganî tifaqê kurdî 4 parçeyan de aver şêro û vat: “Tifaq û yewîye ra teber tu alternatîf vernîya hêzanê kurdan de nîyo. Tena bi rayîrê tifaqêko hîra û neteweyî kurdî eşkenê amancê xo û azadîya xo bigîrê.”
Bozyelî dîyar kerd ke şarê kurd merheleyêka taybetîye ra vîyareno, Rojhelatê Mîyanênî serûbin bîyo û sîstemê vera kurdan krîzêko xorîn de yê û vat ke dewletê îşxalkerî êdî sey verê nêşenê hukmê xo bikerê. Bozyelî nimûne da û vat ke çeleyî de bi wesîleyê Rojawanî heme kurdî wirzîyayî lingan ser û dewaya xo ard ziwan û vat: “Ganî partîyê kurdî bernameyêka serûber û neteweyî ser o pîya bibê. Ganî şarê kurdî sey neteweyêk pênase bikerê û qebul bikerê ke heqê kurdan est o ke herra xo ser o xo îdare bikerê.”
Bozyelî îfade kerd ke Kongreya Neteweyî tena o wext mumkun bena ke 4 parçeyan de tifaqê kurdî bibo û vat ke goreyê tecrubeyanê xo mekanzîmayêka koordînasyonî hîna hewce yo ke 4 parçeyan mîyan de dîyalog û kordînasyonî asan bikero.
Bozyelî peynî de vat: “Wezîfeyê sîyasetmedar û partîyan no yo ke waştişanê şarî bivînê û prosesî fehm bikerê û wina tepşêko neteweyî bigîrê ke şarê kurdî bawer bikero û înan dima şêrê. Bi nê hêzî dewletî zî mecbur bikerê ke heqê kurdan, nasnameyê kurdan û statuyêa kurdan nas bikerê.”
