Avûkatê Rayberê Şarê Kurdî Abdullah Ocalanî, Sabahattîn Kaya dîyar kerd ke reya verên a ke do binê banê Meclîsî de qanûnê çareserî bêrê viraştiş û vat: “Vejîyayîşê qanûnî do bawerîyêk zî xo reyde bîyaro û do bibo gamêka şênbere.”
Rayberê Şarê Kurdî Abdullah Ocalanî bi vengdayîşê xo yê 27ê sibate 2025î prosesê “Aştî û Komelê Demokratîkî” da destpêkerdiş. Çarçewaya nê prosesî de hewteyanê peyênan de têgêrayîşê derheqê amadekerdişê qanûnî de zêde bi û Heyetê Îmralîyî yê DEM Partî zî seba eyn babete 19ê temmuze de şîyê Girawê Îmralîyî û Rayberê Şarê Kurdî Abdullah Ocalanî reyde pêvînayîş kerd. Heyetî pêşnîyazê Abdullah Ocalanî yê derheqê qanûnê çarçewa de goşdarî kerdî ke partîyanê sîyasîyan reyde pare bikero. Hetê bînî ra Serekê Meclîsî Numan Kurtulmuşî zî derheqê babete de MHP, DEM Partî, Koma Yenî Yolî, Kemal Kiliçdaroglu, ÎYÎ Partî û AKP’yî zîyaret kerd û dîyar kerd ke verî ke meclîs bikewo tehtîl ê do pêşnîyazname berê Komîsyonê Pêroyî yê Meclîsî.
Avûkat Sabahattîn Kaya derheqê hedîseyanê peyênan ê prosesî û amadekerdişê qanûnê çarçewa de erjnayîşê muhîmî kerdî.
Sabahattîn Kaya ble ant amadekarîyanê qanûnê çarçewa ser o û da zannayene ke ê pawenê ke qanûn hewtêna bêro meclîsî. Sabahattîn Kaya dîyar kerd ke do nê pêşnîyaznameyî ser o munaweşayî bêrê kerdiş û vat: “Nûman Kurtulmuşî zî serê na babete de partîyanê sîyasîyan reyde pêvînayîşî kerdî. Hêvîyêka winasîn est a ke hewtêna no pêşnîyaznameyo ke amade beno, do prosesî rê bibo cewab. Vejyayîşê nê qanûnan do bawerîyêk zî xo reyde bîyaro û do bibo gamêka şênbere. Ganî heme hetî fikir û ramananê xo ê derheqê nê qanûnan de îfade bikerê. Ganî fikir û ramanê birêz Ocalanî, pêşnîyazê ey, pêşnîyazê sîyasetê kurdan û Têgêrayîşê Azadîye bêrê girewtiş. Ganî xebatêka hempare bêra kerdiş. Tena xebatêka yewhetî û nêzdîbîyayîşêko sey ‘Ez îqtîdar a yan zî ez dewlet a, ez na yewe musaîd vînena, ez do nê qanûnî bîyara meclîsî’ şaş o. Nêzdîbîyayîşê yewhetî feyde nêdanê û seba çareserî zî vernîya ma nêakenê.”
‘Ganî şert û mercê birêz Ocalanî bêrê başkerdiş’
Sabahattîn Kaya dîyar kerd ke çi tewr lezgîn vurnayîşê şert û mercanê Abdullah Ocalanî yo û dîyar kerd ke ganî statuyê ey bêro eşkerakerdiş. Sabahattîn Kaya da zanayene ke başkerdişê şert û mercan do îmkanêko winasîn o o yo ke Abdullah Ocalan zî rolê xo kay bikero û wina domna: “Ganî teqez îmkanê birêz Ocalanî ê sey têkilîya teberî reyde, rêxistina xo reyde, dormeyanê cîyayan reyde bêrê afirnayîş. Na gamêka tewr lezgîn a.”
‘Reya verên a ke do qanûnê çareserî bêrê viraştiş’
Dewamê qiseykerdişê xo de Sabahattîn Kaya bale ant muhîmîya qanûnê çarçewa ser o û da zanayene ke do bibo reya verên ke binê banê meclîsî de qanûnê çareserî yenê vetiş. Sabahattîn Kaya dîyar kerd ke no zaf erjaye û muhîm o û derheqê babete de nê çîyî vatî: “Helbet no tena xo reyde heme probleman çareser nêkeno. Seba destpêkî û bawerîyêk virazo hewce yo. Sewbîna çarçewaya qanûnî de seba agêrayîşî nîka behsê awankerdişê buroyêkê terorî binê banê serdozgerîyan de kênê. Hema çîyêko fermî nêameyo vatiş, labelê eke çîyêko winasîn est bo, no çîyêko lezgîn nîyo. Helbet çîyê winasînî zî do bibê, labelê hema qet muzakereyî serê na babete de nêameyê kerdiş ke do senî bikerê merîyet? Ganî verî şert û mercê birêz Ocalanî bêrê başkerdiş.”
‘Seba girewte û qeyûman zî qanûn hewce yo’
Sabahattîn Kaya rewşa girewteyanê nêweşan ser o vindert û da zanayene ke ganî qanûnê çarçewa de behsê înan zî bêro kerdiş. Sabahattîn Kaya dîyar kerd ke rewşa girewteyanê nêweşan baş nîya û wina dewam kerd: “Sewbîna polîtîkayê ke poşmanîye girewteyan ser o ferz kenê bêrê terkerdiş û qeyûmê ke şaredarîyan ser o yê peyser bêrê antiş. Seba nê çîyan zî qanûnî hewce yê ke vernîya nê kerdiaşn bêra girewtiş. Nê çîyî heme gamê ewilin ê ke do bêrê eştene.”
‘Dima ke çareserîyêka domdar manayê çekan zî nêmanena’
Avûkat Sabahattîn Kaya da zanayene ke peynîya nê prosesî orterawedaritişê çekan o û qiseykerdişê xo wina qedêna: “Demo ke çareserîyêka domdar biba, xora manayê çekan zî nêmanena. Çek encam o, ganî sebebê aye orte ra bêrê hewanayîş. Bawerî û hêvîya min a seba çareserîyêka ewle zaf pîl a. Ganî şarê kurdî sey şarêko awanker ê komarî bêro vînayîş û destûrê bingeyên de zî bêro bicekerdiş. Ganî her kes nê warî de rolê înan çi bo, destê înan ra çi yeno bikero. Eya, hêvî û pawitişê ma zaf pîl ê. Labelê astengîyê vernîya ma zî zaf ê. O semed ra ganî ma bi sebir û awanker nêzdîyê babete bibê û goreyê ruhê demî têgêrê.”
