Badê ke Wezîrê Karanê Zereyî yê Tirkîya Alî Yerlikayayî Amed de çalakîya ke bi sloganê “Bi Rayberîya Azade Ver Bi Cuya Azade” ameye organîzekerdene hedef nîşan daye, 8 ciwanî ameyê destbendkerdene.
Platformê Ciwananê Welatperwer Amed de 18ê teşrîna verêne de bi sloganê “Bi Rayberîya Azade Ver Bi Cuya Azade” rayîrşîyayîşêk organîze kerd. Wezîrê Karanê Zereyî ê Tirkîya Alî Yerlikaya ke şewe beşdarê Kombîyayîşê Emnîyetê Şaristanî yê Amedî bî, ciwanê ke beşdarê rayîrşîyayîşî bîyê, hedef nîşan dayî. Badê nê vatîşan ewro serê sibayî operasyonê sereeştişê keyeyan ame kerdene. 8 ciwanê ke endamê Meclîsê Ciwanan ê Partîya Têduştî û Demokrasî ya Şaran (DEM Partî) ê, ameyê destbendkerdene.
Bi bahaneyê nimitişî derheqê sebebê destbendkerdişî de tu agahî avûkatanê ciwanan reyde nêameyê parekerdiş.
