Rojhelatê Kurdîstanî de 5 partîyanê sîyasîyan semedê têkoşînê vera rejîmê Îranî îtîfako newe îlan kerd. Dîya zanayene ke pêkerdiş seba ke kurdî qederê xo bi xo tayîn bikerê û ameyoxê demokratîkî înşa bikerê ame kerdene.
Rojhilatê Kurdîstanî de 5 partîyan; Partîya Demokratîk ya Kurdistanê-Îran-PDK- Partiya Jiyana Azad ya Kurdistanê-PJAK, Sazumanî Xebata Kurdistanê-Îran, Partiya Azadî ya Kurdistanê-PAK û Komeleya Zehmetkêşan ya Kurdistanê Îtîfaqê Hêzanê Sîyasîyan ê Kurdîstanê Îranî îlan kerd. Nê partîyan badê pêvînayîşanê dergan no pêkerdiş kerd.
Badê pêkerdişî eşkerayî ameye kerdene. Eşkerayîye de ca dîya nînan: ”Têgêrayîşê Rojhelatê Kurdîstanî semedê destfînayîşê heqanê xo yê neteweyî û mîyanneteweyî bi serran o vera bi hewayêkê rêxistinkerde vera dîktatorîye û hukmatê merkezî têkoşîn kenê. Rejîmê Îranî bi seyan rayberê sîyasîyî îdam kerdî, qetil kerdî. Bi hezaran şorişgêrê ciwanî û aktîvîstê sîyasîyî zîndanan de şehîd bîyî û ameyî qetilkerdene.
Ma sey partîyanê sîyasîyan seba ke cewabê rewşa sîyasîye bidê Îtîfaqê Hêzanê Sîyasîyan îmza kerd. Ma Kurdîstan de bi yewkerdişê hêz û xebatanê xo îtîfaqêk na ro. Ma wazenê xebatanê sîyasîyan ê kurdanê ke Îran de yê vera Komara Îranî xurtêr bikerê. Waştişê ma yo verên rijnayîşê rejîmî yo. Ma wazenê Rojhelatê Kurdîstanî de awanîyêka neteweyî ya demokratîke ronê ke îradeyê neteweyî sîyasî yê kurdan îfade bikero. Ma teberê koalîsyonê xo de semedê hemkarîya heme partîyanê sîyasîyan hazir ê.”
