Avûkate Gulîzar Tuncer ziwanê hêrişkarî yê hukmatî rexne kerd û dîyar kerd ke seba çareserîya meseleyê kurdan ganî gamê şênberî bêrê eştene.
Muneqeşeyê çareserîya meseleyê kurdan rojev de dewam kenê. Rayberê PKK’yî Abdullah Ocalan ke Hepisxaneyê Ewlekarîya Berze yê Tîpê F yê Îmrali de şertanê tecrîdê giranan de tepişte yo, 28ê kanûne de heyetê Îmrali yê Partîya Têduştî û Demokrasîya Şaran (DEM Partî) reyde pêvînayîşêk kerd.
Tuncera ke muneqeşeyê “prosesê neweyî” de ziwanê hêrişkarî yê hukmatî rexne kerd û va “Çîyêko yeno vatene çend muhîm o, kerdişê ê çî yê zî hende muhîm o. Nê pîya yewbînan temam kenê. DEM Partî warê usul û metodî de îtîrazêko eşkera nêviraşt. Destpêk ra yew têkilîya ke seyyewbînî nîya ameye rayberdiş. Şarê kurdî heta ewro zaf derd û kulî dîyê. Tesîrê şerî kurdan ser o zaf giran bîyê. Qetlê faîlmeçhulî, vindîbîyayeyî, gerîlayê ke ganê xo vîndî kerdî… Wa hukmat û temsilkarê ey Bahçelî yan zî Erdogan ca de vindê, Ozgur Ozeli ke qisey kerd zî tena esker û keyeyê eskerî ser o vindert. Coka tîya de tena dewlete û menfeetê ey xo mojnenê.”
Tuncer wina dewam kerd: “Ganî sey azadîya fîzîkî yê Abdullah Ocalanî û mahkumanê sîyasîyan û vindarnayîşê xespê qeyyûmî gamê şêber bêrê eştene” û vat ke prosesî de tecrîd û problemê kurdan ganî hewayêko pêroyî bêrê destgirewtene. Tuncer dîyar kerd ke proses ganî hawayêko demokratîk û beşdarbîyayîşê şarî reyde dewam bikero û ard ziwan ke qala aştî ganî komelî mîyan de vila biba.
‘Aştî mabênê hetan de virazîyena’
Tuncer bale ant ke aştî mabênê hetanê ke şer kenê, virazîyena û vat: “Eke aştîyêk bibo verê cû ganî mabênê hetanê ke şer kenê, bibo. O wext Qendîl kamcayî nê prosesî de yo? Demê verênî de heyetê HDP’yî tena nêşîyêne Îmralî, Qendîlî reyde qisey kerdêne. Çunke ê yê ke pratîkî de kenê vateyê înan zaf muhîm o û feyde keno.”
