Verê ke Amerîka û Îran dest bi kombîyayîşo dîyin ê muzakereyanê nukleerî ser o bikerê, reaksîyonê balkêşî vejîyenê orte. Nînan ra yew zî piştgirîya Talîbanî ya seba Îranî ya.
Verfekê Hukmatê Talîbanî Zabihullah Mujahîd 15ê sibata 2026î de beşdarê Radyoya Îranî bi ke bi ziwanê Peştûnî weşan kena. Mujahîd şerêko mumkun ê Amerîka û Îranî ser o qisey kerd û dîyar kerd ke mabênê Amerîka û Îranî de şer biqewimîyo, hukmatê înan do paştî bido Îranî. Verfekê Hukmatê Talîbanî Mujahîdî da zanayene ke hukmatê înan nê helwêstê xo sey sozêo teqez nêdano Îranî.
‘Şerê 12 Rojan de Îran serkewt’
Mujahîdî ard vîr ke ê nêwazenê mabênê Amerîka û Îran de şerêk vejîyo, seba ey paştî danê muzakereyanê programê nukleerî yê Îranî. Mujahîdî eşkera kerd ke ê muhîmîye danê dîyalogî û îdia kerd ke Îran şerê 12 Rojan ê hezîran 2025î de serkewt, Îsraîl û Amerîka binkewtê. Mjahîdî dîyar kerd ke şerêko bîn vejîyo do reyna Îran serkewa. Goreyê Mujahîdî no îmkanê Îranî est o. Hukmatê Talîbanî hêrişanê Îsraîl û Amerîkayî yê vera Îranî şermezar kerdbi.
Tewrê pêkewtişanê mezhebî zî têkilî aver şona
Rîyê mezhebanê Şîî û Sunî pêkewtişê mabênê rejîmê Îranî û Hukmatê Talîbanî dewam kenê. Îran Şîîtîya 12 îmaman esas gêna, Hukmatê Talîbanî zî mezhebê Sunî esas gêno. No zî pêkewtiş û makokîya her di hetan xorîn keno. La dima ke Talîban Afganîstan de bi îqtîdar, hemkarîka her di hukmatan aver şîye. Wezîrê Karanê Teberî yê Hukmatê Talîbanî Mevlevî Emîr Han Muttakî û Wezîrê Karanê Teberî yê Îranî Abbas Arakçî û heyeto ey reyde bi, Kabîl de ameyê têhet û pêvînayîş kerd. Pêvînayîşî de babeta koçberanê Afganîstanî û ewleyîya sînorî bîye hempar. Arakçîyî demê zîyaretî de Serekê Hukmatê Talîbanî Mohammed Hassan Akhundî reyde zî pêvînayîş kerd.
