Hemserekê Rêxistina Heqanê Merdiman ê Efrînî Îbrahîm Şêxo dîyar kerd ke goreyê peymana 29ê çeleyî Meclîsê Efrînî yê Qamişlo de amadekarîyan kena ke seba 400 kesî agêrê Efrîn û wina vat: “Nika Efrîn girêdayê Hukmatê Demkî yê verê 2 rojan dewrê 30 kesî seba şaredarîya Efrînî rayra berê ameyê wezîfedarkerdene. La Tirkîya vernîya agêrayîşê koçberan de asteng a. Serê çapemenî de vanê ma xo apey anto la no rast nîyo. Bi hawayêko fermî 5 baregehê leşkerî yê Tirkîya Efrîn de yê û hema zî xo apey nêanto. Serêkanî de zî tu vurnayîş çinî yo. Grûbê girêdayê Tirkîyeyê hema zî Serêkanî de yê. Goreyê peymane ganî Tirkîya uca ra apey bêro û koçberê Efrîn û Serêkanîyî zî agêrê ca û warê xo. Pêvînayîş est o la vurnayîş çinî yo.” Şexo dîyar kerd ke Tirkîya nika vernîya pêameyîşî de astengîya tewr gird a û peymane bin pê kena.
Mabênê Rayberîya Xosere û Hukmatê Demkî yê Şamî de badê hêrişan 29ê çele de peymanêk ame îmzakerdene. Peymane ser o 15 rojî derbas bî. Nê 15 rojan de xeylê averşîyayîşî zî goreyê peymane pêameyê. Walîyo ke hetê Rayberîya Xosere ra ame weçînayene tayînê Hesekê ame kerdene, mabênê hêzê asayîşî Rojava û Hukmatê merkezî de warê entegrasyonî de averşîyayîş virazîya. Rojanê aver de zî yeno pawitene ke hetê rayberî û sazgehê sivîlan reyde zî entegrasyon virazîyo. Yew madeya muhîme yê entegrasyonî rewşa koçberanê Efrînî û Serêkanî yê. Goreyê peymane ganî Tirkîya Efrîn û Serêkanî ra apey şoro û koçberê Efrîn û Serêkanîyî agêrê ca û warê xo.
Her çend dayîşûgirewtiş mabênê Rayberîya Xosere û Hukmatê Şamî de û averşîyayîşê peymane zî Tirkîya hema zî hêzê xo yê leşkerî Efrîn û Serêkanî ra apey nêantê. Nêantişê hêzanê leşkerî binpaykerdişê peymane yê. Rewşa Efrîn û Serêkanî ameyox de do senî bo, hetê raya pêroyî ra yeno merak kerdene. Hemserekê Rexistina Heqanê Merdiman ê Efrînî Îbrahîm Şexo derheqê Averşîyayîşê peymane û rewşa agêrayîşê koçberanê Efrînî û Serêkanî Ajansê Welatî (AW) rê qisey kerd.
‘Amadekarîya agêrayîşê 400 koçberan yeno kerdene’
İbrahim Şêxo da zaneyene ke goreyê peymane seba agêrayîşê koçberanê Efrînî û rayberîya uca de averşîyayîş est o û wina vat: Meclisê Efrînî yê Qamişloyî amadekarî kenê seba 400 kesî agêrê Efrîn eke hûmare temam bibo do bêrê erşawitene. Wina aseno ke do wextêko nêzdî de bibo. Walîtîya Helebî vernîya 2 rojan dorê 30 kesan seba şaredarîya Efrînî rayra bêrê ameyê wezîfedarkerdene. Yê ke ameyê wezîfedarkerdene kurdê la girêdayê Hukmatê Şamî yê. Efrîn do hetê Hukmatê Şamî ra bêro rayra berdene. Efrîn herêmêke kurdan o, seba ey zî xususîyetê herême do verê çiman de bêro girewtene û kurdî zî do rayberîye de ca bigîrê.”
‘Welatijê Efrînî seba bieşkê agêrê Efrîn ganî ca û warê înan bibo’
Dewamê qiseyê xo de Îbrahîm Şexo ard ziwan ke seba agêrayîşê koçberanê Efrînî ganî ca û warê înan bibo û wina qisey kerd: “Peymana mabênê Rayberîya Xosere û Hukmatê Demkî yê Şamî de ameya îmzakerdene de agêrayîşê koçberanê Efrînî û Serêkanî ser o madeyî est ê. Hetê Serêkanî ra tu vurnayîş çinî yo. Hema zî dewleta Tirkîya îta ya. La Efrînde badê ameyîşê îktîdarê HTŞ’î Şamî ser, rayberîya Efrînî kewte destê Hukmatê Demkî yê Şamî û hînî vurnayîşî virazîya yê. La grûbê çekdarî yê girêdayê Tirkîya û îstîxbaratê Tirkîya hema zî Efrîn de yê. Welatijê Efrînî ke koçberê Reqa û Tebqa bîyê, badê hêrişan na rey verê xo daye herêmê Rayberîya Xosere sey Qamişlo û Hesekê. Welatijê Efrînî seba bieşkê agêrê Efrîn ganî ca û warê înan bibo. Wextêko welatijê Efrînî koçber kerdî û o wext teber ra erebî ardê cayê înan de bi ca kerde.”
‘Tirkîya hema zî hêzê xo Efrîn û Serêkanî ra nêantê’
Îbrahîm Şêxo dîyar kerd ke goreyê peymane hema zî Tirkîya hêzê xo Efrin û Serêkanî ra nêantê û wina vat: “Tirkîya bi rayîrê çapemenî vana ma Efrîn ra xo apey anto. La bi hawayêko fermî 5 baregehê leşkerî yê Tirkîya Efrîn de yê hema zî apey nêantê. Serêkanî de tu agahî çinî yê. Yanê rewşa Efrînî û Serêkanî de tu vurnayîş nêbîyo. Rewşa Efrînî goreyê Serêkanî ra baştir o. Serekanî de grûbê çekdarî yê girêdayê Tirkîya hema zî uca yê. Goreyê peymane ra tu vurnayîş çinî yo. Goreyê peymane ra ganî Tirkîya uca ra vejîyo û koçberê Efrîn û Serêkanî zî agêrê ca û warê xo. Pevînayîş est o la vurnayîş çinî to. Pêameyîş se ra se bawerî nêdano şarî. Semedê ke ma dî pêameyîşî vernîya nika senî binkewtê. Eke pêameyîş aver şêro Efrîn do vernîya Serêkanî çareser bibo. Semedêko rayberîya Efrînî destê Hukmatê Demkî yê Şamî de yo. La rayberîya Serêkanî destê grûbanê çekdar yê girêdayê Tirkîya de yê. Wina aseno ke wextêko kilm de zaf kesî Efrînî do agêrê ca û warê xo.”
