Aktîvîsta TJA’yî Çaglar Demîrel bale ant manayê sloganê, “Jin jîyan azadî” û “Mûnitişê gêsanê cinîyan” ke dinya de gulbang da ser o û vat: “No ne tena sey reaksîyonêk hemverê hêrişanê bedenê cinîyan ser o nîyo, redkerdişê zîhnîyetê koletî û awankerdişê cuyêka newîye ya azade yo.”
6ê çeleyî de çarçeweya Peymana Parîsî de çeteyê HTŞ, SMO û DAÎŞ’î bi piştgirîya Tirkîya hêrişê taxanê Eşrefîye û Şêxmeqsûd ê Helebî kerd. Çeteyan tewr zêde hêrişê nasnameyê azade yê cinîyan kerd û dîmenê gêsêka birnaya vila kerdî. Badê na hedîse heme cinîyanê kurd û cinîyanê dinya, 7 serrî ra heta 70 serrî porê xo gêsî kerd. Badê felsefeyê Jin Jiyan Azadî ke heme dinya de bîyo sembolê xoverdayîş û azadîya cinîyan, pêlê mûnitişê gêsan mojna ke cinîyê dinya têkoşînê têgêrayîşê cinîyanê kurd sey rayîrê azadîye vînenê.
‘Jin Jîyan Azadî felsefeyê cuye yo’
Demîrel vat: “No felsefeyêkê cuye yo ke hetê Rayber Apoyî ra ameyo afernayene. Azadîya komelî rasterast girêdayeyê azadîya cinîyan o. Heta ke cinî ramanî û fîzîkî azad nêbê, komel nêeşkeno behsê demokrasî bikero. Jin Jiyan Azadî Vakurî ra dest pêkerd, heta Rojava, Başûr, Rojhelat û uca ra dinya ra vila bi û sînorê xo derbas kerdî. Tena cinîyanê kurdî de nê, mîyanê cinîyanê Rojhelatê Mîyanên û dinya de vila bî. Parlementoyê Ewropa de zî qiseyî ameyê kerdene, her kes peynîye de vano ‘Jin Jiyan Azadî.’
Gêsî: Kulturî ra heta serewdaritiş
Çeteyanê DAÎŞ’î Rojava de porê cinîyanê xoverdayoxan birna. Amancê ci tena hêrişêko fîzîkî bi. Waşt ke cinîyan bikerê kole, nasname, ziwan û kulturê înan çin bikerê. La cinîyan nê hêrişî vurna çalakîyêka xoverdayîşî. Dinya de cinîyan, gedeyan û kalojîyan porê xo gêsî kerd, camêrdan zî porê xo qesna. Înan peyamê ‘şima nêeşkenê ma bikerê kole, ma gêsanê xo newe ra şîn kenê” da.”
Vengdayîşê yewîya neteweyî
Demîrel peynîye de vengda cinîyanê kurd û vat: “Yewîya kurdan tena meseleyêka sîyasî ya mabênê partîyan de nîya, meseleyêka cuyayîşî ya. Cinîyê kurdî ganî pêşengîya Kongreya Neteweyî bikerê. Heta ke cinî na yewîye awan nêkerê, yewîya sîyasî nêbena. Çunke na yewîye, yewîya kultur, ziwan û pawitişê destkewteyan a.”
