Çemê Nîlî yê vakurê Sûdanî de vizêr şand keştiyêk binawe bîye. Hedîse de tewr tay 21 kesî merdî.
Rayedaranê herême dîyar kerd ke roja pancşeme cenazaya 21 kesan ameya vînayîş. Sebebê qeza ser o agahî nêameyê girewtene. Rayedaran eşkera kerd ke cigêrayîşî seba kesanê vîndîbîyeyan dewam kenê.
Goreyê eşkerayî, keştî nêzdîyê şaristanê Shendî ke 200 kîlometre vakurê paytextê Hartume de yo, seferê mabênê dewanê Tayba el-Hawad û Deim el-Karai kerdêne.
Şahidanê ke AFP’yî rê qisey kerd, dîyar kerd ke keştî ser o 30 kesî est bî. Tora Doktaranê Sûdanî (SDN) eşkera kerd ke 6 kesî ameyê xelasnayîş.
Sûdan de seba ke hîrê serrî yo şer dewam keno, binesazî ameya rijnayene.
Temmuza 2024î de nêzdîyê 20 kesanê ke cehd kerdêne ke şer ra biremê, çemê Nîlî yê eyaletê Sennarî de qezaya keştî de cuya xo vîndî kerde.
Nîsana 2023î ra nat artêşa mabênê Sûdanî û Hêzê Paştîdayena Bilez ke hêzêke paramîlîter ê, şer qewimîyeno. O wextî ra yo ke rayîrî girewte yê û xizmetê umumî asteng bîyê.
