Endamê Heyetê Îmralîyî yê ke Erdoganî reyde pêdîyayî, vat ke “Muhîm o ke çarçeweya qanûnîye ke heme beşanê komelî gêno xo mîyan û bibo bingeyê ameyoxê demokratîkî yê Tirkîya, bê ereymendişî û bi pêameyîşo tewr hîra bivejîyo meydan.”
Endamê Heyetê Îmralîyî yê DEM Partî Pervîne Buldan û Mithat Sancar derheqê pêdîyayîşî de ke vizêrî Serekkomarê Erdoganî reyde kerd, eşkerayîye daye û vat:
“Ma sey Heyetê Îmralîyî yê DEM Partî, Serekkomarê Birêz Erdoganî reyde pêdîyayîşêko muhîm kerd. Averşîyayîşê herême, tesîrê nînan ê Tirkîya û Prosesê Haştîye û Komela Demokratîk ser o ma îstîşare kerd.
Pêdîyayîşî de îradeyo hevpar ke prosesî do bi qerardarîye dewam bikero, yewna rey ame teyîdkerdene. Seba ke gamê şênber û bawerîdayoxî bêrê eştene, ame vatene ke hewcedarîye est a ke Meclîs, wezaretî û sazgehê dewlete xebatanê xo xorîn bikerê. Na çarçewe de, ame îfadekerdene ke ganî raporê Komîsyonî bi nêzdîyayîşêko verareker bêro hazirkerdene û demokratîkbîyayîş û azadîyan ser o bingeyêko pêt bido.
Ma bawer kenê ke no pêdîyayîşo ke wextêk de ke averşîyayîşê muhîmî sîyasetê cîhanî û herêmî de yenê ciwîyayîş, ame kerdene do hetkarîye bikero ke şarê Tirkîya û herême de haştîye de pîya biciwîyê.”
