Elsa Wong ke seba piştîdayîşê Kobanî bi Înîsîyatîfê Karwanê Şaran şîye Pirsûs, vat: “Xoverdayîşo ke Rojava de bi pêşengîya cinîyan yeno kerdene, ganî merdim ci rê bibo roşnî!”
Esla Wong ke ameye Tirkîya ke piştî bido şorişê Rojava, Stenbol de ameye destebendkerdene û deport bîye, ajansê ANF’yî rê qisey kerd.
Elsa Wong ke Fransa ra ameya û pîyê ci Çîn ra yo, maya ci Fransa ra ya, meseleya kurdan wexto ke Marsîlya de koçberanê kurdan rê fransizkî musnayêne, uca de nas kerd. Wonge vat ke xoverdayîşê şarê kurdî aye ser o zaf tesîr kerdo û wina vat: “Çiqas ke nê heme dejî dîyo zî şarê kurdî qet xoverdayîşî ra fekveranêdayo û no bîyo tewirê ciwîyayîşê înan. No hêvî û îlham da mi.”
Wong vat ke ewro dinya de krîzêko daîmî est o û bombardumanê enformasyonî merdiman pasîf keno û nêverdano ke reaksîyon bimojnê. Bi taybetî vatişê mîlîtarîst û nasyonalîstan ke Ewropa de zêde benê, parçeyê şerê propaganda yê. Wonge vat ke ganî hemverê nê ferzkerdişî de, bi îlhamê têgêrayîşê antîmîlîtarîst ê tarîxî, hişmendîya enternasyonalîste bêra berzkerdene.
Wonge vat ke wexto ke aye dorpêçê vera Kobanî pêhesîyaya, bilezûbez kewta têgêrî û wina vato: “Seba ke gedeyî serdî ra mirenê û cinî yenê kiştene, kesêk nêeşkeno bêveng bimano.” Wonge ard vîrî ke hêzê emperyalîstî seba feydeyanê xo her kesî xebitnenê û wexto ke feydeyê înan nêmano, caverdanê. Tena piştîpêdayîşê şaran eşkeno nê hêrişan bişikno. Wonge wina domna: “Ez perspektîfê Abdullah Ocalanî yê netewa demokratîke ya hemverê modernîteya kapîtalîste ra bawer kena. Şarî tena perspektîfêk de ke bawerî, kultur û nasnameyê nîjadî pîya bi hurmet ciwîyenê û cinî afirnayox û kerdoxê cuye yê, eşkenê aştî de biciwîyê. Hedefgirewtişê cinîyan hetê çeteyanê cîhadîstan ra tesadûf nîyo. Cinî seba ke merkezê rêxistinkerdişê cuye û xoverdayîşî de yê, sey tehdîd yenê vînayene.”
