Hemşaredara Şaredarîya Amedî ya Şaristanê Girdî Serra Bucak, destbendkerdişê Hemşaredaranê Şaredarîya Akdenîzî Hoşyar Sariyildiz û Nurîye Aslan rê reaksîyon nîşan da û dîyar kerd ke ê do hemşaredaranê şaredarîyan rê wayîr bivejîyê.
Seba destbendkerdişê Hemşaredaranê Şaredarîya Akdenîzî Hoşyar Sariyildiz û Nurîye Aslan ke çarçewaya tahqîqatê Dozgerîya Komarî ya Mersînî de ameyî tepiştiş, beyanatê çapemenî ame dayene. Beyanatê ke vera Şaredarîya Akdenîzî de ame dayene, tede Hemşaredara Şaredarîya Amedî ya Şaristanê Girdî Serra Bucak, Hemşaredarê Şaredarîya Yenîşehîrî Mehmet Ergun, Hemşaredarê Şaredarîya Sûrî Adnan Orhan, Hemşaredara Şaredarîya Pasûrî Fatma Ay, endamê meclîsî û temsîlkarê rêxistinanê sivîlan beşdar bîyî.
Hemşaredare Bucak: Ma qet yew xesbî qebul nêkenê
Hemşaredare Bucak beyanatê çapemenî de qisey kerd û ard vîrardene ke kurdî hem weçînayîşê 31ê Adare de hem zî verê cû xebatanê komelkî û sîyasî de nîşan dayo û wina dewam kerd: “Ez selam dana îradeyê şima ke şima wayîrîye ey vejîyenê. Ma qet yew xesb û darbeyî qebul nêkenê. Ma vîzêr zî qebul nêkerd ewro zî qebul nêkenê. 2016 de ke qeyyûmê verênî ameyî tayînkerdiş ma va ke no antî-demokratîk o, 2019 de hemşaredaranê ma 3 aşmî nêeşkayî bixebitîyê, şima reyna qeyyûm tayîn kerd se bî? Şaran rastîya xo ra, xeyalê dinya ya azad û seypê ra fek nêverada û veng da partîya xo ke temsîlkarê naye ya. Weçînayîş vengê nê şarî yo. Eke şima cayê herêmkîyan de vengê şaran bibirnê, no do peynîya hukmê şima bîyaro. Akdenîzijê erjîyayeyî, tîya de her kuncikê Tirkîya ra şarî û bawerî est ê. Ma zanê ke demokrasî eşkena bi şeklê têreydeşîyayîşê şarî ya zaf cayê herêmkîyan ra bêro. Coka ma do ewro ra hîna zaf wayîrîye hemşaredaranê şaredarîya xo û endamanê meclîsê ma yê weçînayeyan bivejîyê. Heta ke o qeyyûmî yew bi yew şêrê. Esenyurt, Mêrdîn, Batman, Başqela, Dêrsim, Pulur yê şarî yê. Wa o zihnîyet ke wazeno ma awanîyanê şaredarîyan ra vejo, baş bizano ke; ma awanîyanê şaredarîyan de bi ca nêbenê.”
‘Ma do dewam bikê pîya biciwîyê’
Hemşaredare Bucak qeyd kerd ke karê ke awanîyanê şaredarîyan de kenê tena seba xizmetê nê şarî yo û qiseykerdişê xo wina dewam kerd: “Wexto ke şarî tîya de vera hukmî vindert, dayîkî tîya de vanê aştî, vanê ciwîyayîşo newe; ê xemê qeyyûman kenê. Kam beno, qeymeqam beno, walî beno, hetkarê ey beno ey dima şîyê. Şarê ma yo erjîyaye, ma bi hêrs ê la ma do bi înad dewam bikê vajê aştî û pîya biciwîyê. Qet yew hêz nêeşkeno hêvîya pîyaciwîyayîşê aştîyane yê şaran bişikno. Têkoşîno ke serran ra dima yeno dayene teqez do aştî bîyarê. Teqez do şarê ma yo ke koçber bîyo agêro waranê xo. Şarê ma yo ke koçber bîyo do bi şeref keyeyanê xo de biciwîyo. Ma do pîya têkoşîn bidê, ma do wayîrîye hemşaredaranê şaredarîya xo û endamanê meclîsê xo bivejîyê. Ma do her ca de vajê ke qeyyûm sîstemêko antî-demokratîk o û yew hacet o ke şaran keno dijminê yewbînan. Ma do her ca de polîtîkaya qeyyûmî eşkera bikê û ma ra dima çareyo bîn çin o ke bêrê têhet û rayîrê demokratîkî awan bikê.”
