Endamê Konseya Hemserekîya PYD’yî Aldar Xelîlî dîyar kerd ke dorpêçkerdişê Kobanî vera huqûqê mîyanneteweyî yo û vat ke no cehdê qirkerdişî yo.
Endamê Konseya Hemserekîya PYD’yî Aldar Xelîlî adirbestî ra dima ajansê ANF’yî erjnayîşî kerdî û îfade kerd ke çîyê ke qewmîyayî, cehdê qirkerdişê kurdan bîyê.
‘Adirbest waştişê HSD’yî nêbî’
Aldar Xelîlî derheqê adirbestî de qisey kerd ke mabênê HSD û hukmatê demkî yê Şamî de ameyo îlankerdene û wina vat: “Adirbesto ke ame îlankerdene, HSD’yî nêwaşt, no waştişê Amerîka bi. Planê înan, seba vetişê girewteyanê DAIŞ’î û erşawitişê Îraqî ê DAIŞijan bi. Ma sey HSD, YPG, YPJ û heme şarê Rojava amadekarîyêka xurte kerde. Her çend ma amadeyê adirbest û dîyalogî yê zî, ma seba şerî zî amade yê.”
Aldar Xelîlî dewamê qiseykerdişê xo de bale ant dorpêço ke wazenê Kobanî ser o ferz bikerê ser o û wina dewam kerd: “Kobanî prosesêko çetin ra vîyareno. Dorpêço ke Kobanî ser o ameyo kerdene merdimîye ra dûrî yo û huqûqê mîyanneteweyî de nêyeno qebulkerdene. Bi nê dorpêçî fikirîyenê ke îradeyê şarî bişiknê. La no şaro ke bi serran o seba azadîya xo têkoşîn dano, mumkun nîyo ke vera naye de apey game bierzo û sere rono. Birnayîşê heme lazimtîyanê cuye yê şaristanêkî, maneno waştişê wedarnayîşê ê şarî. No yeno manayê cehdê kerdişê jenosîdî.”
Aldar Xelîlî derheqê berdişê DAIŞijan wina vat: “Eke çeteyanê DAIŞ’î benê Îraqî, fehm beno ke vera Îranî planêk est o. Seba caardişê nê planî ganî Îraq de kaos bivirazîyo. Mesela tena Rojava nîya; no planê heme herêm o. Ma zî nê planî mîyan de cehdê pawitişê xo kenê.
‘Kewtişê Rojava kewtişê Vakur, Başûr û Rojhelatî yo’
Wa şarê ma bizano ke vera ma şerêk yeno kerdene. Kewtişê Rojava beno kewtişê Vakur, Başûr û Rojhelatî. Eynî wextî de beno kewtişê tecrubeyê demokrasîye yê Rojhelatê Mîyanênî. Wa dewleta tirkan bizano. Eke şer hende aver şêro, şima zî zerar vînenê. Tirkîya nêeşkena aver şêra, demokrasî nêeşkena Tirkîya de awan bibo, meseleya kurdî zî nêeşkena bêra çareserkerdene.”
