Şaredarîya Amedî ya Şaristanê Girdî, bi munasebetê Hewteyê Gopala Sipîye ya Koran (7-14ê çeleyî) seba koran perwerdeyê “Hereketê Xoserî” da destpêkerdene.
Serekîya Daîreya Xizmetê Astengdar û Kokiman, çarçewaya Hewteyê Gopala Sipîye ya Koran de seba ke korî xoser û bi emnîyet hereket bikerê, Keyeyê Molayî yê Şehîtlîkî yê Yenîşehîrî de programê perwerdeyî yo ke do aşmêk dewam bikero, dest pêkerd.
Perwerde de teknîkê dîyayîşê hîsî û gerayîş û hunerê îstîqametî ra heta zaf babetan ser o do bêro vindarnayene. Beşdarî do teknîkanê teqîb û rayîrşîyayîşê rêberî û şuxulnayîşê gopale ser o zî perwerde bigêrê.
Bi nê perwerdeyî hem şuxulnayîşê gopale do bêro teşwîqkerdene hem zî rayîrê hereketkerdişê xoserî û bi emnîyetî do bêro akerdene. Reyna korê ke beşdarê perwerdeyî bîyî, înan rê hetê Şaredarîya Şaristanê Girdî ra gopala sipîye ameye dayene.
Korê ke wazenê beşdarê perwerdeyî bibê, ganî Cayê Ciwîyayîşê Hemparî yê Sumerparkî de Serekîya Daîreya Xizmetê Astengdar û Kokiman ra muracat bikerê.
‘Gopala sipîye esasê xo de manaya ciwîyayîşî ya’
Perwerdekar Abdulmecît Yilmaz ke bi xo zî kor o, va ke ê seba ke korî ciwîyayîşê xo bi xo biramê, nê perwerdeyî organîze kenê. Yilmazî wina dewam kerd, “7-14ê çeleyî Hewteyê Gopala Sipîye ya Koran de zaf çalakî yenê kerdene. Ma seba ke merdimî zanayîş bigîrê nê perwerdyî virazenê. Sewbîna ma wazenê ke embazê ma yê korî keyeyanê xo ra vejîyê teber. Ma nika bi 10 kesan dest pêkerd. No perwerdeyê ma do aşmêk dewam bikero. Ma hedef kenê ke embazê ma badê perwerdeyî gopala sipîye bişuxulnê. Gopala sipîye esasê xo de manaya ciwîyayîşî ya, çunke ma wexto ke wazenê bi gopala sipîye teber ra cayêk ra şêrê cayêko bîn, ma astenganê ke verê ma de yê tesbît kenê û rehet hereket kenê.”
