Serekê DYA’yî Donald Trumpî dîyar kerd ke rayedarê Îranî vizêrî ey reyde têkîlî ronaya û waştişê muzakereyan kerdo.
Çalakîyanê numayîşê yê Îran û Rojhelatê Kurdîstanî ke 28ê kanuna 2025î de hemverê krîzê ekonomî virazîyaybî, pêroyî eyaletanê Îran de vila bîyê, dewam kenê. Heta nika çalakîyî 31 eyaletan ra 28 heb eyalatan ra vila bîyê, nêzdîyê 180 şaristan û qezayan de bêmabên dewam kenê. Bi seyan kesî çalakîyan de ameyê kiştene û bi hezaran kesî ameyê destbendkerdene. Rixmê tedayanê rejîmî zî çalakî roje bi roje vila benê.
Vera hêrişanê rejîmî hêzê mîyanneteweyî tena vatişanê sey “ma bi endişe yê” danê. Serekê DYA’yî Donald Trump, seba mudaxalekerdişê Îranî cagiranê xo reyde dest bi mişewreyî kerd. Trumpî dîyar kerd ke badê nê serebûtan rayedarê Îranî vizêrî ey reyde tekîlî ronaya û waştişê muzakereyan kerdo.
‘Beno ke kombîyayîşî ra ver ma gaman bierzê’
Trumpî dîyar kerd ke dimayê tehdîdê mudaxalekerdişî yê DYA’yî, îhtîmalê pevînayîşî bi rayedaranê Îranî vejîya meydan û vat: “Labelê seba çîyê ke qewimîyenê, beno ke ma kombîyayîşî ra ver bêçare bimanê ke gaman bierzê.”
Trumpî derheqê numayîşan de zî vat: “Çalakîyan ser o ez her wext yeno agahdarkerdene. Ma çend weçînekan zaf xurt erjnenê. Ma do wextêko kilm de qerarê xo bidê.”
