Platforme Cinîyan ê Dêrsimî no şan de seveta Gulîstan Dokuye kuçeyê Hunerî de ameyî pêser û hetanû serê çarşîyê binerdî meş kerd. Sere nameyê Platformê cinîyan Handan Kahraman, Wekîla Dêrsimî Ayten Kordu, Maye, pî û waya Gulîstane qisey kerd.
Serê nameyê platformê cinîyan Handan Qahraman Şanlî qisey kerd û wina va: “Gulîstan Dokuye endî bivînê, hatanû nika çira nêamê dîyayene? Ma hetanû ke Gulîstane amê dîyayene dawa xo ra nêbenîme.”
Wekîla DEM Partîye yê Dêrsimî Ayten Kordu zî qiseykerdişê xo de bale ante serê bêhuqûqîye û wina va: “Na dawade huqûq çino, bîyo 6 serrî hîna tawa nîyamo orte, hetê huqûqî ra averşîyayene çina. Ma pê na dawaye nêverdanîme. Na bêedaletîye hatanû kotî sona.”
Maya Gulîstan Doku Bedrîye Dokuye zî wina va: “Çêneka mi, wendekar bîye, xo rê wendene, kamîrê sekerd, çira çêneke mi nêvînenê. Kamî ke çêneka mi kerde vîndî, pey dî de vîndenê. Heq kenê çêna mi bivîne û ma rê bîyarê.”
Pîyê Gulîstan Doku Halît Doku behsê çend serranê ke yenê şinê encam nêgênê kerd û wina domna: “Ma çend rey ameyme, şîme, hundê dej dî, hundê hêşîrîye ma rê bes nîya? Çêneka ma, ma rê bîyarê.”
Waya Gûlîstan Dokuye zî wina va: “Waya mi teyna jû kesî nêkîşte, zaf kesî mîyanê na kîştene de estê. Ma xapnayîme va ke ‘na çêneka sima xo eşt awe,’ jûr kenê. Roje yena her çî vejîno meydan.”
