Platformê Şubeyan ê KESK’î yê Amedî derheqê vêşbîyayîşê enflasyonî de vernîya awanîya TUÎK’î de eşkerayî daye. Eşkerayî de wina ame vatene: “Ma do 14ê çele de bi hewayêko pêroyî nêşîrê kar û grev bikerê.”
Bi pêşengîya Platformê Şubeyan ê Konfederasyonê Sendîkayanê Karkeranê Raya Pêroyî (KESK) yê Amedî eşkerayî daye çapemenî. Eşkerayî de endam û rayberê şubeyanê girêdayeyê KESK’î, parlamentera DEM Partî ya Amedî Adalet Kaya û xeylê kesî beşdarê eşkerayî bîyê.
Eşkerayî de pankartê, “TUÎK destnê xo tonekanê ma ra veje û hûmarî sexte yê, rişwet rast o” ame girewtene. Eynê wextî de sloganê “Ma do teslîmê zûranê TUÎK’î nêbî” , “Ma do mhekumê sefaletî nêbî” , “Do kedkarî AKP’yî ra hesab biperdê” , “Ma wazenê cuyêka merdimine biciwîyê” û “Biciwîyo têkoşînê ma yê rêxistinkerde. Metnê çapemenî hetê Hemserekê Şubeyê Sendîkaya Kedkaranê Buroyî (BES) yê Amedî Guneş Ozerî ra ame wendene.
Guneş Ozerî eşkerayî de vêşbîyayîşê enflasyonî rexne kerdû vat ke Sazgeha Îstatîstîkî ya Tirkîya (TUÎK) hûmaranê rast raya pêroyî reyde pare nêkena. Guneş Ozerî dîyar kerd ke bacê ke dewlete gêna zî heme toneka şar û kedkaran ra vejîyenê. Guneş Ozerî îfade kerd ke butçe seba çekan yena abirnayene û şar zî feqîr beno.
Guneş Ozerî dîyar kerd ke ê sey şubeyê endamê girêdayeyê KESK’î tîya ra qîrenê û vat: “Ma nê sîstemê koletîye qebul nêkenê û ma do nêmusê nê sîstemî. Musayîş yeno manayê qebulkerdişê sîstemî. Dem, o dem o ke ma na feqîrî û vêşanîye ra vajê bes o. Bêrê ma vera nê sîstemî ke bi serran o ma rê feqîrîye ferz keno, paştî bidê yewbînan û vera ci vinderê.”
‘Ma do grev bikerê’
Eşkerayî ra pey Hemserekê Şubeyê Egîtîm Senî yê Hûmara 2. yê Amedî Serhat Kiliçî qisey kerd û vat: “Rixmê eşkerayîyanê TUÎK’î zî aseno ke do tay çîyan bi zorî ma rê danê qebulkerdene. Ma do zî bêveng nêmanê û ney qebul nêkerê. Ma do sey kedkaranê endamê KESK’î 14ê aşme de bi hewayêko pêroyî nêşîrê kar û grev bikerê.”
