Pêvînayîşê Heyetê Îmralîyî yê DEM Partî û Serekê Pêroyî yê Partîya Gelecekî Ahmed Davutogluyî ra pey eşkerayîya çapemenî ameye dayene. Eşkerayî de Mîthat Sancarî îfade kerd ke merhekeya dîyine vetişê qanûnanê aştî yo û Ahmet Davutogluyî zî dîyar kerd ke ganî proses bilez bêro rayraberdene.
Endamanê Heyetê Îmralîyî yê DEM Partî Pervîn Buldan, Mîthat Sancar û Faîk Ozgur Erolî, Serekê Pêroyî yê Partîya Gelecekî Ahmet Davutogluyî reyde merkezê pêroyî yê Partîya Gelecekî de pêvînayîş kerd. Pêvînayîşî de parlamenterê Îzmîrî Mustafa Bîlîcî, Cagirê Serekê Pêroyî yê Partîya Gelecekî Alaattîn Firat û Ayhansefer ustunî zî ca girewt. Pêvînayîşê derheqê prosesê Aştî û Komelê Demokratîkî de nêzdîyê saetêk û 20 deqîqe dewam kerd. Pêvînayîşî ra pey endamanê heyetî û Ahmet Davutoglu derheqê pêvînayîşî de eşkerayî daye.
‘Qanûnê aştî’
Mîthat Sancarî eşkerîyî de nê çîyî vatî: “Ma pêvînayîşêko muhîm kerd. Waştişê ma hem melumatdayîş hem zî mişawre yo. Ma derheqê pêvînayîşî de ke 2ê kanûne de Îmralî de ame kerdene, melumatî dayê. Ma ganî qebul bikerê ke nika ma merheleya dîyine de yê. Babetê serekeyî
yê merheleya dîyine bingeyê huqûqî yo, sererastkerdişê qanûnî yê. Ma rastkerdişê qanûnî binê sernameyê ‘Huqûqê Aştî’ de îfade kenê.
Mutabakato sîyasî şertanê tewr muhîm ê averşîyayîşanê nê prosesî ra yew o. La ganî mutabakato sîyasî heto bîn ra bingeyê mutabakatê komelkî ser o zî bibo û mutabakatê komelkî gird bikero. Proseso ke wina vurnayîşêko girs wad keno, hem aştîya kurdan hem aştîya heme Tirkîya hem aştîya Rojhelatê Mîyanênî hem zî hesabanê mîyannetewî ser o potansîyelo girs est o; mutabakato sîyasî û pêkerdişê komelkî zaf muhîm ê.”
Pervîn Buldan îfade kerd ke pêvînayîşê înan pozîtîf vîyarto û nê çîyî vatê: “Ez wazena vaja ke pêvînayîşêko zaf berhemdar bi. Ma merheleya ke resayê, ey reyde pare kerd. Ma merheleya dîyine de hetkarî û piştgirîya ey
waşt. Merheleya dîyine de ma behsê bingeyê qanûnan kenê. Ma behsê bingeyê aştî, qanûnanê aştî kenê. Zîyaretê ma do dewam bikerê. Ma partîyanê sîyasîyan ke grûba înan est a, pêro zîyaret kenê û peynîya zîyaretan de ma plan kenê ke Birêz Serokkomarî reyde zî
pêvînayîşêk bikerê. Dima do zîyaretê ma yê girawe zî bibo.”
Ahmet Davutoglu: Ganî gamî bilez bêrê eştene
Davutogluyî dîyar kerd ke ê merheleyêka krîtîke de yê û vat: “Ma raşta zî merheleya krîtîke de yê. Ganî ma Pêro haydar bibê. Prosesêko hîrê lingan ganî bi îdarekerdişêko zaf baldar, bi diqet û baş plankerde biramîyo. Wezîfeyê Komîsyonî o yo ke raporan bilez amade bikero û raya pêroyî reyde pare bikero. Dima ra zî derheqê prosesê qanûnî de, derheqê bingeyê huqûqî de ganî çi bêro kerdene, ganî bilez bêro kerdene. Goreyê mi proses hêdî şono. Ma zi hêvî kenê ke mutabakato sîyasî bêro ca û proses baş şîro. Mutabakto sîyasî zaf muhîm o. Ma do tîya ra pey piştgirîya prosesî bikerê. Prosesê Sûrîye zî zaf muhîm o. Rojhelatê Mîyanênî de reyna vejîyayîşê DAÎŞ’î seba zaf zehmet beno. Ganî prosesê ucayî zî goreyê Peymana 10ê adare pawitişê herra Sûrîye û caardişê heqanê demokratîk ê waûbirayanê ma yê kurd de çareserîyêk bêra ca. Ez zî sipasîya heyetî kena.”
Persan ser o Ahmet Davutogluyî dîyar kerd ke ganî heqê ziwanê Kurdkî çarçewayê heqanê merdiman de bêro ca. Ma na babete sey babeta heqanê merdiman vînenê. Davutogluyî helwêstê îqtîdarî ser o zî vat ke berpirsîyarîya girde kewena milanê îqtîdarî ser o û ganî îqtîdar prosesî bilez rayra bero la çi heyf ke îqtîdar prosesî bilez rayra nêbeno. Davutogluyî dîyar kerd ke ganî îqtîdar yewî wezîfedar bikero ke proseso sîyasî rayra bero.
