Dewijê dewa Husika ke vera viraştişê kananê madenî vindenê, dîyar kerd ke do nêverdê dewa înan û xozaya înan bêra talankerdene.
Îqtîdarê AKP’yî bi rayîrê şîrketan talankerdişê xozaya Kurdîstanî xo rê kerdo amanc. Bi serran o xeylê şaristanê Kurdîstanî de polîtîkayanê talanî rayra benê. 25ê teşrîna peyêne de bi seyan leşkerî bi erebeyanê zirxî seba pawitişê kanê ponzî yê Şîrketê Oyak Çîmentoyî kewtê dewa Goma Husika ya qezaya Çinara Amedî. Şîrket seba ke giranê dewe ser o kananê madenî akero, zordarîye keno. Dewij û komelê ekolojîyî vera talanê xozayî reaksîyon mojnenê, hewl danê vernîya talanî bigîrê. Derheqê babete de dewijan nerazîbîyayîşê xo îfade kerdê û vat ê do nêverdê xozaya înan bêra talankerdene.
Dewijanê Goma Husika vera Şîrketê Oyak Çîmentoyî û îqtîdarî reaksîyon mojna û dîyar kerd ke ê girê ke wazenê kananê madenî tede akerê cayê ramitiş û weyekerdişê pezanê dewe yo.
‘Ma bikişî zî ma erdê xo canêverdanê’
Dewijan dewe ra Hesîbe Turgay vera şîrketî reaksîyon mojna û da zanayene ke kanê madenî eke tîya de bêrê akerdene do cugehê înan bibo çol û vat: “Ma girê xo nêdanê, ma daranê xo canêverdanê, citgehê ma çin ê, ma heywananê xo tîya de weye kenê. Ma bikişî zî ma erdê xo canêverdanê.”
‘Do cayanê ma yê pîroz birijnê’
Dewija dewe Sidika Turgay zî dîyar kerd ke no gir cayê weyekerdişê heywananê înan o û vat: “Goristanê ma uca de yo, uca de zîyare est a. Nê cayê ma yê pîrozî do bêrê rijnayene. Heywanê ma nê giran ra debara xo kenê. Na dewe de cinî biqedîyê, camêrdî biqedîyê, gedeyî biqedîyê zî ma warê xo ra fek veranêdanê. Ma se kerdo înan yenê belayê xo danê ma, wa ma ra dûrî vinderê.”
‘Ma canê xo danê la darêka xo nêdanê’
Dewijê bi nameyê Dogan Turgayî zî dorpêçkerdişê dewe yê hetê Şîrketê Oyakî û leşkeran sey bêrêzî erjna û vat: “Tîya cayê pî û kalanê ma yo, ma nê cayan de cuya xo domnenê. Ma dewaya xo ra fek veranêdanê. Ma canê xo danê la darêka xo nêdanê.”
