Welatijanê Amedî şîyayîşê endamanê Komîsyonê Meclîsî yê hetê Rayberê Şarê Kurdî Abdullah Ocalanî erjna û înan dîyar kerd ke ganî nê pêvînayîşî ra pey dewlete êdî gamanê şênberan bierza.
Endamê Komîsyonê Demokrasî, Waûbirayî û Piştîdayîşê Mîllî seba ke Rayberê Şarê Kurdî Abdullah Ocalanî reyde pêvînayîş bikerê roja 24ê teşrîna peyêne şîyê Girawa Îmraliyî. Endamê Komîsyonî Serekwekîla Grûba DEM Partî Gulîstan Kiliç Koçyîgît, Cagirê Serekê Pêroyî yê MHP’yî Fetî Yildiz û Parlamentero AKP’jij Huseyîn Yamanî Îmrali de Rayberê Şarê Kurdî Abdullah Ocalanî reyde pêvînayîş kerd.
Hemwelatijanê Amedî pêvînayîşê Komîsyonî yê Rayberê Şarê Kurdî Abdullah Ocalanî reyde erjna û înan dîyar kerd ke pêvînayîşê nimiteyî nêyenê qebulkerdene û waşt ewnîyayîş û fikrê Ocalanî raya pêroyî reyde bêro parekerdene. Reyna welatijan bale ant azadîya fîzîkî ya Rayberê Şarê Kurdî Abdullah Ocalanî ser o û vat heta ke Abdullah Ocalan azad nêbo, komel zî azad nêbeno.
‘Şîyayîşê Komîsyonî yê Îmraliyî çîyêko baş o’
Reşehat Adayî derheqê şîyayîşê komîsyonî yê hetê Rayberê Şarê Kurdî Abdullah Ocalanî de wina vat: “Komîsyon şi û pêvînayîş kerd, no çîyêko zaf baş o. Aştîyêka birûmete do awan biba. Wa her kes baş bizano ke heta Serekê ma azad nêbo, welatê ma û girewteyê ma yê sîyasî zî azad nêbenê. Şarê ma zî, komel zî azad nêbeno. La eke gamê pozîtîfî hetê dewlete ra nêrê eştene, ma qebul nêkenê. Ma do heta azadîye xover bidê.”
‘Wa şar bizano ke se beno’
Bozan Baran zî gazinê xo vera eşkeranêkerdişê tedeyîyanê pêvînayîşî îfade kerdê û vat: “Çira nimitkî şonê, wa eşkera bikerê. Ma nêzanê çi ameyo qiseykerdene. Eke goreyê xo qisey bikerê, ma do senî dewlete ra bawer bikerê. Wa êdî heqanê kurdan bişinasnê. Ma wazenê wa heme çî şarê reyde bêro parekerdene ke şar bizano ka çi qewimîyeno.”
‘Azadîya ey azadîya ma ya’
Almast Bagci zî bale ant azadîya Rayberê Şarê Kurdî Abdullah Ocalanî ser o û nê çîyî vatî: “Wa Serok Apo û heme girewteyê ma veradîyê. Wa êdî aştî biba û Serekê ma û girewteyê ma biresê azadîya xo.”
‘Bi hemkarîye aştî bena’
Welatijo bi nameyê Vedat Sosyalî zî îfade kerd ke bi hemkarî û yewîye aştîyêka domdare eşkena bêra ca û vat: “Şîyayîişê Komîsyonî yê Girawa Îmraliyî, çîyêko zaf baş o û ma do serkewê. Proses vengdayîşê Rayberê Şarê Kurdî Abdullah Ocalanî û bi hemkarîya Devlet Bahçelîyî aver şi. Ma şîyayîşê komîsyonî zî xeylê pozîtîf vînenê. Ma wazenê êdî komelêko azad de biciwîyê.”
‘Wa ê zî waûbirayîya ma qebul bikerê’
Muhammed Yilmaz zî vat: “Heyet şîyo Girawa Îmraliyî no çîyêko zaf baş o. Abdullah Ocalan 27 serrî yo hepisxane de yo, no zî îradeyêko zaf bihêz wazeno. Merdimêk nêeşkeno hende serrî tena bimano. Senî ke ma bi çimê waûbirayî şarê tirkî ra ewnîyenê, wa ê zî ma wina qebul bikerê.”
‘Azadîya Serek Apoyî do probleman çareser bikero’
Welatijê bi nameyê Omer Şahînî zî vat: “Wa êdî Serek Apo azad bibo, demo ke Serek Apo azad bo êdî problemî orte ra wedarîyenê. Gonî bi gonî nêyena pakkerdene. Nê semedî ra zî êdî azadîye bêra nê welatî.”
