Neteweyê Yewbîyayeyî (NY) raporêkî de eşkera kerd ke 2025î de rojêk de 137 cinî ameyê kiştene.
Buroyê vera Tîryak û Sucan û Yewîneya Cinîyan a Neteweyanê Yewbîyayeyan (NY) bi munasebetê 25ê Teşrîna Peyêne Roja Têkoşînê Mîyanneteweyî ya Vera Şîdetî yo ke Cinîyan rê Yeno Kerdene raporê sucanê kiştişê cinîyan ê 2025î weşana.
NY’yî raporî de dîyar kerd ke pêroyî dinya de rojane 137 cinî ameyê kiştene û se ra 60î nê cinîyan bi destê partner yan zî ferdanê keyeyê xo ameyê kiştene.
Mudirîyetê Beşê Sîyasî yê Yewîneya Cinîyan ê NY’yî ra Sarah Hendricks derheqê babete de da zanayene ke sucê qetilkerdişê cinîyan tena bi sereyê xo nêbenê. Sarah Hendricksî dîyar kerd ke kampanyaya “16 Rojanê Çalakîya vera Şîdetê Bingeyê Cînsîyetî ser o” ya emserrî eşkera kena ke şîdeto dîjîtal zaf reyan tena bi înternetî sînordar o la beno ke xirabêr bibo, heta bireso kiştişî.
Sarah Hendricksî îfade kerd ke ganî pêroyê waranê cuye de heqê cinîyan ê ewlebîyayîşî est bo û wina vat: “Seba girewtişê vernîya sucan bicaardişê qanûnanê ke senî vernîya şîdetê vera cinîyan bêro girewtene, lazim o.”
Mudirîyetê Buroyê vera Tîryak û Sucan ê NY’î vat ke rapor ano vîr ke ganî stratejîyê vernîgirewtişî û cewabdayîşê edaletê cezayî yê hemverê qetilkerdişê cinîyan bêrê caardene.
Goreyê raporî 2024î de nêzdîyê 50 hezar cinî û gedeyê kênekî hetê kesanê nêzdîyê xo ra ameyê kiştene.
