Raybera DAKAH-DER’î ke vera netêduştîya cînsîyetî têkoşîn dana, Pelîn Ozkahramanî waşt ke heme cinî vera kiştişê cinî û gedeyan wirzê û hemverê şîdetî de vinderê.
Heme qadanê cuye de her roje şîdetê vera cinîyan vêşî beno. Cinîyê vakurê Kurdîstan û Tirkîya vera şîdetê hemverê cinîyan têkoşînêko hempar danê. Komele û rêxistinê cinîyan çarçewaya 25ê Teşrîna Peyêne Roja Têkoşînî ya Vera Şîdetê Cinîyan ser o ya Mîyanneteweyî de xeylê çalakîyê cîya cîyayî organîze kerdê. Nê komelan ra yewe zî Komela Rewşa Cinîyan a Piştgirîye (DAKAH-DER) a. DAKAH-DER vera netêduştîya cînsîyetî rewşa cinîyan û LGBTÎ’yan a komelkî, kulturî, psîkolojîk û sosyo-ekonomî de cigêrayîşan kena. Na komele serra 2018î ra hetê grûbêka cinîyanê wendekar ê unîversîte ra ame awankerdene, seba cinîyan bihêz bikero, xebatanê xo domnena. Komele bi amancê awankerdişê cuyêka demokratîke ke heq û azadîyê merdiman bêrê garantîkerdene, edaleta komelkî û aştî serdest a, zîhnîyetê rayapêroyî viraza û paştî bida kes û rêxistinanê ke na babete ser o xebitîyenê, ameya awankerdene. Rayberanê DAKAH-DER’î ra Pelîn Ozkahraman behsê awankerdişê komele û xebatanê ci kerd.
‘Vera netêduştîya cînsîyetî têkoşîn danê’
Pelîn Ozkahramanî vera netêduştîya cînsîyetî de her tim bi her hewayî têkoşîn danê û wina vat: “Ma endamanê xo perwerde kenê û xebatanê rêxistinkerdişê endaman ramnenê. Ma vatişanê parlamenteran, xeberanê medyaya dîjîtale cigêrayîşanê taybet û muhîm kenê. Bi nê cigêrayîşan ma raporan amade kenê. Bi kesanê pispor reyde podcastan amade kenê û endamanê xo reyde pare kenê. Ma wazenê hemverê zordestan cinîyan bipawê.”
‘Piştgirîye bidê cinî, gede û kesanê LGBTÎ’
Pelîn Ozkahraman bale ant çalakîyanê cinîyan ê çarçewaya 25ê Teşrîna Peyêne Roja Têkoşînê Vera Şîdetê Cinîyan Ser o ya Mîyanneteweyî ser o û vat: “Ma her serre mabênê 20 û 25ê Teşrîna Peyêne de xebat û çalakî kenê. Ma xebatê hunerî kerdê, problemê cinîyan bi kayê tîyatroyî vatê. Ma wazenê 25ê Teşrîna Peyêne de bi heme cinîyan rayra şêrê. Ma wazenê vengê xo berz bikerê û bibê yew. Ma veng danê her kesî ke seba cinî, gede, û kesanê LGBT’yî yê ke ameyê kiştene û înan rê şîdet ameyo kerdene, pîya vinderê û piştgirîye bidê înan.”
