Komîsyonê Meclîsî qeraro tarîxî girewt, komîsyon şono hetê Rayberê Şarê Kurdî Abdullah Ocalan. DBP’î zî qerarê Komîsyonî ser o beyanato nuştekî da. DBP’î va ke çinhesibnayîşê iradeyê çareserîye, inkarkerdişê waştişê aştîye û yeksanîye yê şaran o!
Komîsyonê Demokrasî, Wayûbirayî û Paştdayîşê Netewîye, kombîyayîşê 18. de qeraro tarîxî girewt û pêvînayîşê Rayberê Şarê Kurdî Abdullah Ocalan reyde ser o raydayîşêko ‘eya’ da, CHP’î kombîyayîş terk kerd. Kombîyayîşê Komîsyonî de qerarê wa Rayberê Şarê Kurd Abdullah Ocalan reyde pêvînayîş bêro kerdene vejîya.
CHP’î bi qerarê xo pêroyîya Tirkîya ra rexne girewt, Partîya Herêmanê Demokratîkan zî qerarê komîsyonî yê tarîxî ser o beyanato nuştekî da.
Beyanatê DBP’î wina yo:
“Meselaya Kurdan de ke problemê komelkî yê Tirkîya yê tewr giran û kokdaran ra yew o, nê demê ke geyrayîşê çareserîya demokratîke û aştîya dayîmî ameyo verê astêka newîye, qerarê ke Komîsyonê Meclîsî seba pêvînayîşê bi Birêz Abdullah Ocalanî ra girewto, hetê tarîxê sîyasî ra muhîmîya ci bêro vînayîş. No qerar, teyna tesdîqkerdişê destûrê yew zîyaretî nîyo; hetê akerdişê berê vurnayîşê demokratîkî yê Tirkîya ra qerarêko tarîxî yo.
Perspektîfê çareserîye yê Birêz Ocalanî ke serran o rameno, beranê Tirkîya ra yew o ke aştîye ser o abeno. Pêwendîya weşe ke reyna bi Birêz Ocalanî ra bêro ronayîş, musneno ke muzakereyê demokratîkî awan bibo, mumkun o. Coka qerarê Komîsyonî, teyna seba şarê kurdî nê; seba demokratîkbîyayîşê pêro Tirkîya û xurtkerdişê cuye û amadeyê muşterekî krîtîk o.
Labelê vera nê firsendê tarîxî de, tewr verê cî de CHP û tayê derûdoran, Îmrali de aktorê serî Birêz Ocalanî reyde qerarê nêvînayîşî girewto. Bêşik no tewir, semîmîyetê înan ê seba sîyasetê demokratîkî û aştîye bi hawayêko cidî dayo persnayîş. No tewirê CHP; nawnayîşê rojaneyî yê polîtîkayanê înkarperest û zordaran o ke seserrî ra zêde yo merkezê aqilê dewlete de ca genê. No nêzdîbîyayîşê redkarî; berhemê yew aqilê sîyasî yo ke rayîranê çareserîye gêno, zemînê aştîye keno qels û beno manî ke Tirkîya de yew nîzamê hemwelatîya yeksane nêro ronayîş.
Odaxê sîyasîyî ke nê aqilê sîyasî reyde eynî xete de vinderenê, mecbur ê ke bi ciddîyet bifikirîyê ke no tewirê înan ê ewroyîn xizmetê inkarî, bêdemokrasîye û bêadaletîye keno. Nêvînayîşê iradeyê muşterekî yê şaran û sivikgirewtişê îhtîmalê çareserîya demokratîke; ferzkerdişê perspektîfê neteweperestî yê tengî ra wet nîyo.
Eynî tewir, raya pêroyî de wexto ke behsê proseyê çareserîye beno, partîyê ke her tim vatişê manîpulatîfî virazenê û verê aştîya komelkî gênê, qet yew faydeyê înan seba amadeyê demokratîkî yê Tirkîya çin o. Vateyê nê kes û gruban, refaxetê xetêka polîtîke kenê ke şerî kenê girs û bêçareserîye kenê xorîn.
Ewro ê ke iradeyê aştîye red kenê, raştîye de sîyasetêk teqîb kenê ke amadeyê muşterek ê komelî, hêvîya cuye ya ciwanan û heqê pîya cuyayîşê şaran fînenê tehluke. Her tewiro ke çareserîya demokratîke ya problemê kurdan ra remeno, beno sebebê xurtbîyayîşê otorîterîye û xorînbiyayîşê kutuplaşmayê komelkîyî.
Halbukî hewceyîya Tirkîya kifş a; sîyaseto wêrek, muzakereyo semîmî, çareserîya demokratîke û hurmetê seba iradeyê muşterekî yê şaran.
Sey DBP vengdayîşê ma zelal o
Wa wayîrê iradeyê aştîye bêro vejîyayîş! Paştî bidê her game ke verê çareserîye akena. Vera polîtîkayanê înkarperest, akerdox û ê ke iradeyê şaran çin hesibnenê, têkoşînê aştîya demokratîke pîl bikerê û dewaye ra peyser memanê.
Pêro beşê komelî, partîyê sîyasîyî, dezgehê sivîlî û her ferdo ke terefdarê aştîye yo; ganî peyê nê gamê tarîxî yê Komîsyonê Meclîsî de vinderê û hêz bidê proseyê çareserîya demokratîke. Aştîye amadeyê yew beşî nîya, amadeyê pêro Tirkîya ya.
Coka, nê qerarî ra peyser agêrayîş mesulîyetêko tarîxî yo. Çunke muxalefetkerdişê îmkananê aştîye û aştîye bi xo, sey şemilnayîşê raştîye yo. Amadeyê muşterek ê komelî, hêvîya cuye ya ciwanan û proseyê demokratîkbîyayîşî, nêşêrê binê sîya nêzdîbîyayîşanê redkaran de.
Vurnayîşê demokratîkî û aştîya dayîmî mumkun a; teyna wa cesareto tarîxî bêro nîşandayîş û goş bidîyo iradeyê şaran.
Partîya Herêmanê Demokratîkan (DBP)”
