Fermandarê Pêroyî yê HSD’yî Mazlum Ebdî forumê Dihokî de qisey kerd û dîyar kerd ke êdî mumkin nîyo ke Sûrîye sey dewletêka merkezî bimana û vat: “Ganî Sûrîyeyêka nemerkezî bêra awankerdene.”
Fermandarê Pêroyî yê Hêzanê Sûrîya Demokratîke (HSD) Mazlum Ebdî Forumê Aştî û Ewleyî yê Rojhelatê Mîyanênî ke Dihok de ame kerdene, qisey kerd.
Mazlum Ebdîyî bale ant prosesê aştî yê vakurê Kurdîstanî û Tirkîya ser o û vat ke no proses hetê Rayberê Şarê Kurdî Abdullah Ocalan ra ameyo destpêkerdene.
Mazlum Ebdîyî bale ant meseleyanê Sûrîye ser o û vat: “Êdî mumkin nîyo ke Sûrîye dewletêka merkezî ba, ganî êdî Sûrîye nemerkezî biba. Sûrîyeyêka newa yena awankerdene.”
Mazlum Ebdîyî têkilîya Şamî reyde ser o qisey kerd û wina vat: “Mabênê ma û Şamî de pêameyîşêk est o la belge lazim ê. Problemo tewr pîl ê mabênê ma de bawerî ya.”
‘Peynîya her şerî dîyalog o’
Mazlum Ebdîyî muhîmîya dîyalogî ser o qisey kerd û nê çîyî vatî: “Peynîya her şerî dîyalog o. Ma ewro rayîrê dîyalogî weçînayo, problemî bi şer nêyenê çareserkerdene.”
Mazlum Ebdîyî bale ant Peymana 10ê Adare ya mabênê Rayberîya Xosere û Hukmatê demkî yê Şamî ser o û vat ke peymane vernîya şer û parçebîyayîşê Sûrîye girewto. Mazlum Ebdî da zanayene ke prosesê mabênê înan de her çend giran bo zî Sûrîye de prosesêkê pêvînayîşan est o.
‘Rayber Apo prosesî dayo destpêkerdene’
Mazlum Ebdîyî prosesê aştî yê vakurê Kurdîstanî ser o zî wina vat: “Vakurê Kurdîstanî de prosesê aştî dest pêkerdo, Rayber Apoyî nê prosesî dayo destpêkerdene.”
Mazlum Ebdîyî dîyar kerd ke başûrê Kurdîstanî paştî dano Rojavayê Kurdîstanî û vat: “Heme kurdî eşkenê awankerdişê Sûrîyeya newa de bi rolêko gird ca bigîrê.”
Mazlum Ebdîyî derheqê tehdîtanê Tirkîya yê vera Rojavayî zî vat: “Ma tu wext hêrişê kesî nêkerdo. Beşdarîya ma ya mîyanê sazgehanê dewlte seba Tirkîya bi tehluke nîyo.”
