Serekê Amedsporî Nahît Eren dîyar kerd ke qerarê akerdişê pankartê Mustafa Kemalî qerarê înan nêbîyo û vat: “No hewte heme taximî bi eyn pankartî vejîyayê maç.”
Serekê Amedsporî Nahît Eren Tesîsê Amedsporî yê Şehmus Ozerî de derheqê rewşa Amedsporî de kombîyayîşê çapemenî organîze kerd. Rayberê Amedsporî zî beşdarê kombîyayîşî bîyê.
‘Amancê ma serkewtiş o’
Nahît Erenî ard vîrî ke rayberîya înan 18ê teşrîna verêne de ameye weçînitene û vat: “Dima ke ma ameyê rayberîye, ma bi lez dest bi karanê qlubî kerd. Ma fehm kerd ke barêko giran milanê ma û kayekeran ser o yo. Maçanê peyênan de taximê ma serkewte yo. No mojneno ke amancê ma o yo ke ma rêzanê verên ê lîgî de bibê. Nika rewşa taximê ma û puananê ci serkewte yê. Amancê ma gird o. Ma qerarê bawerî û serkewtişî ser o xebitîyenê.”
‘Pankart qerarê TFF’yî ser o ame akerdene’
Nahît Erenî bale ant maçê roja şeme ya Stada Tahîr Elçî ser o ke kaykerî bi pankartê “vîrardişê Mustafa Kemalî” vejîyayê maçî û wina vat: “Xeylê şîrove û rexneyê neheqî pankartî ser o ameyê kerdene. Demo ke taximêk vejîyeno maçêk bi qerarê Federasyonê Futbolî yê Tirkîya (FFT) vejîyeno maç. Ma taximêkê ke girêdayeyê FFT’yî. Qerarê akerdişê pankartê vîrardişê Mustafa Kemalî zî qerarê FFT’yî bi. Heme maçanê nê hewteyî de heme taximî bi eyn pankartî vejîyayê maç. O semed ra qerarê akerdişê pankartî ma nêdayo.”
‘Taxim û terefgirê ma aştîwaz ê’
Nahît Erenî îfade kerd ke taxim û terefgiranê înan her dem goreyê rihê futbolî yê dostanîye, aştî û têduştî têgêrenê û wina vat: “Ma nika ra pey nêwazenê tu astengî vernîya taximê ma û terefgiranê ma de est bo. Ma û terefgirê xo senî ke maçanê dostane û aştîyane wazenê, ma wazenê taxim û terefgirê bînî zî hemverê ma de wina têgêrê û slogananê vera ma nêvajê.”
