Şaîro kurd Arjen Arî serrgêra wefatê xo de mezela xo ser o ame yad kerdene. Yadkerdişî de mae vatene ke kulîyato ke Arjen Arî xo ra pey verdayo, seba şarê kurdî mîrasêk o.
Şaîro kurd Arjen Arî 12ê teşrîna verêne ya 2012î de Amed de riyê nêweşîya kanser ra dinyaya xo bedilnaybî. Arjen Arî serrgêra wefatê xo de mezela xo ya Goristanê Yenîkoy ê Amedî de ame yadkerdiş. Keyeyê Arjen Arî, temsîlkarê Weşananê Sor, nuştox û temsîlkarê sazgehanê sîvîl beşdarê yadkerdişî bîyê. Mezela Arjen Arî ser o mumî ameyê paneyene û dima nuştox Berken Bereh û waya Arjen Arî, Necla Akay qisey kerd.
‘O kulîyato ke xo ra pey verda, seba ma mîrasêk o’
Nuştox Berken Berej bale ant nuştoxîya Arjen Arî ser o û mîraso ke xo ra pey verdayo û wina vat: “Ma bi şîyayîşê to xemgîn ê la o kulîyat o ke to xo ra pey verdayo, seba ma mîrasêk o. Ez bawer a o nika Meleyê Cizîrî, Ehmedê Xanî, Cegerxwîn het de yo. Çunke ey zî waştêne bibo Cegerxwînê serdemo newe.”
‘O nê welatî ra bi û birayê heme kurdan bi’
Waya Arjen Arî, Necla Akay zî bale ant nuşte û şîîranê Arjen Arî ser o û vat: “Ma ey ra zaf hes kerdêne. O tena birayêk nêbi, o nê welatî ra bi û birayê heme kurdan bi. E ke waştêne bi Kurdkî biciwîyê û biwanê, eşkenê ney şîîranê Arjen Arî de bivînê. 13 serrî vîyartê la ma nêzanê ma do çend serrna bê to biciwîyê. Ez bawer kena ke xeylê çîyê ke to do bikerdêne est bîyê, la nêbi.”
