Endamê Konseya Rayberdişî yê KCK’yî Mustafa Karasuyî îfade kerd ke qerarê Tirkîya ra xoapeyantişê gerîlayan dewlete teşwîq keno ke gaman bierza û vat: “Qanûnê azadîye û bi hewayêko azad xebitîyayîşê Rayber Apoyî gamêka krîtîke ya prosesî ya.”
Endamê Konseya Rayberdişî yê KCK’yî Mustafa Karasu ke beşdarê programêko taybet yê Medya Haber TV bi, çarçewaya Prosesê Aştî û Komelê Demokratîkî de xoapeyantişê hêzanê gerîlayan ê Vakurê Kurdîstanî ra û gamanê yew hetî, rolê Rayberê Şarê Kurdî Abdullah Ocalanî yê seba prosesî, berpirsîyarîya dewleta tirke, na çarçewa de waştişê zemînê demokratîk û huqûqî û têkoşînê komelê rêxistinkerdeyî erjnayî.
‘Gamê yew hetî, firsend danê dewlete ke game bierza’
Mustafa Karasuyî vat: “Na game yew hetî bîye. Labelê ma xora pê eştişê zaf gamanê yew hetî firsend danê dewlete û îqtîdarê AKP û MHP’yî ke gaman bierzê. Ma wazenê zemînêk virazê ke bieşkê gaman bierzê. Xora Rayber Apoyî destpêkî ra pê nezdîbîyayîşêko maqul no proses resnayo ewro. Bîye yew serre. Serrêk a no proses dewam keno. Eke hîna hetê prosesî ra qisey beno, sebebê ci o yo ke berpirsîyarîya Rayber Apoyî ameya caardene û ma zî goreyê perspektîfanê Rayber Apoyî hareket kerdo.”
“Nika wextê qiseykerdişî nîyo, wextê îcraatî yo”
Karasuyî vat: “Ma nika gamêka zaf muhîme eşte. Yew gama ke prosesî newe ra gandar kerd. Ma pê na gama xo prosesî newe ra gandar kerd û ma îqtîdar û dewlete zî teşwîq kenê ke na xebate de rolê xo bivînê, ê zî gaman bierzê. Lazim o ke wina bêro dîyene. Lazim o ke ma gaman bierzê, wextê qiseykerdişî vîyart. Yew vatiş est o, ‘Însan pê karanê xo yeno şinasnayene, pê qiseyanê xo ney.’ Bi taybetî yewo ke do gama pratîke bierzo, îqtîdar o. Nê problemî kam do çareser bikenro? Ma çareser kenê? Eya, ma têkoşîn kenê, ma wazenê bêro çareserkerdiş, ma zor danê. Labelê nê probleman, dewleta tirke û îqtîdar virazenê.”
“Lazim o qanûnê azadîye bêrê viraştene”
Karasuyî vat: “Ma Kongreya 12. Kerd û qerarî girewtî. Nê qerarî Rayber Apo ma rê rêz kerdî. PKK amebî fesihkerdiş, têkoşîno çekdarî ame qedînayîş. Labelê pratîkbîyayîşê naye rê, ganî Rayber Apo rayberîye bikero, biresno pratîkî. Seba naye ma bi taybetî îfade kerd ke Rayber Apo ganî azad bixebitîyo û biciwîyo. Çunke eke Kongre no qerar nêgirewto, yanî eke qerar vejîyayo meydan ganî Rayber Apo nê qerarî tatbîq bikero. Lazim o ke zemînêko demokratîk yê sîyasetkerdişî bibo. Lazim o ke qanûnê azadîye bêrê viraştene. Ma qanûnê ke însanan heqê hêvîye ra mehrum kenê, nêwazenê. Ma wazenê ke Rayber Apo azad biciwîyo û bixebitîyo. No seba prosesî rind beno. Eya, destpêk de weş qiseykerdiş, maqul qiseykerdiş muhîm bi, no lazim bi. Labelê nika qiseykerdişî ra zêdeyêr lazim o ke tayê çî bêrê kerdene. Her çend heqê temamî nêdano zî tayê çîyê maqulî vajîyayî. Labelê lazim o ke waştişê naye bêro kerdene. Ganî gamê ke ma îfade kerdê bêrê eştene.”
“No proses tena yê îqtîdarî nîyo”
Karasuyî vat: “Nê prosesî tena îqtîdar çareser keno yan zî ma çareser kenê, wina yew çî çin o. No problemêko komelkî yo. Hêzê demokrasîye yê Tirkîya, şarê kurdî, roşnvîrî, înan ser o wezîfeyêka girde est a. Şarê ma, hêzê demokrasî ganî nê prosesî de têkoşîn bidê û atmosferêk virazê ke îqtîdar zî game bierzo. Seba naye komel ganî xo rêxistine bikero, têkoşînê komelê rêxistinekerdeyî bikero.”
