Ramazan Demîr o ke 30 serrî ra pey zindanî ra tehlîye bi, Amed de bi girseyî ame pêşwazîkerdene. Ramazan Demîrî vat: “Parçeyêkê ma zindan de yo. Têkoşîn reyna zî dewam keno.”
Girewte Ramazan Demîr Teşrîva Verêne ya 1994î de hetê Mehkemaya Ewleyîye ya Dewlete (DGM) ra ame girewtene. Demîr dima ke ame girewtene bi îdiaya “endamtîya rêxistine” ame muhakemekerdene û cezaya muebedî ey rê ameybî dayene. Demîr hepisxaneyanê sey Amed, Ordu, Meletî û tewr peyên zî Hepisxanaeyê Tîpê T’yî yê Amedî ra 30 serrî ra pey veradîya. Ramazan Demîr ke hepisxane ra ame tehlîyekerdene, vernîya awanîya Komela Piştîdayîşî ya Keyeyanê Girewte û Hukimweran reyde (TUAY-DER) ya Amedî ra ame pêşwazîkerdene. Pêşwazî de Dayîkê Aştî, rayberê rêxistinan sîvîl û xeylê kesî amade bîyê. Pêşwazî de sloganê “Bijî berxwedana zindanan” ame vatene.
‘Parçeyêkê ma zindan de ye’
Ramazan Demîr veradayîşî ra pey hisê xo ardê ziwan û vat: “30 serrî yo ma xeylê bedêlê giranî dayê. Ma zanê ke dewaya ma veng nêşîya. Xeylê embazê ma est ê ke 30 serrî xo pir dekerdê la reyna zî veranêdîyenê. Hema zî serekê ma zindan de yo. Parçeyêkê ma zindan de yo. Têkoşînê ma reyna zî dewam keno. Ma hêvîdar ê ke keda ke ma daya do biresa serkewtiş û azadîye.”
