Temsîlkarê KESK’î seba KHK’yîyan Amed ra ver bi Anqara dest bi rayîşîyayîşî kerd. Hemsereka Şubeyê BES’î ya Amedî Guneş Ozel dîyar kerd ke OHAL’î ser o 7 serrî vîyartê la tesîrê ci hema zî dewam kenê.
Platformê Konfederasyonê Sendîkaya Karkeranê Pêroyî (KESK) seba kesanê ke bi rayîrê KHK’yî karê xo ra ameyê dûrvistene, bi sloganê “Ma do karê xe-o apey bigîrê” Amed ra ver bi Anqara dest bi rayîrşîyayîşî kerd. Rayîrşîyayîş do 5 rojan dewam bikero. Rayîrşîyayîşê Karkeranê Pêroyî Amed ra dest pêkerd. Do ver bi Riha, Semsûr, Dîlok, Edenê û Mersîn dewam bikero. Rayîrşîyayîş do Anqara de biqedîyo. Rayîrşîyayîşî de pankartê “Vera bêhiqûqî ma rayra şonê / Li dijî bêhiqûqî em dimeşin” ame akerdene û sloganê “Biciwîyo Xoverdayîşê Karkeran / Bijî Berxwedana Kedkaran” ameyê akerdene. Rayîrşîyayîşî de Hemserekê Pêroyî yê KESK’î, parlamenterê partîyanê sîyasî, endam û rayberê KESK’î û xeylê kesî amade bîyê. Girse demo ke ame vernîya edlîyeya Amedî eşkerayî da. Hemsereka Şubeyê BES’î ya Amedî Guneş Ozel eşkerayî daye.
‘Demê OHAL’î de 125.612 kesî bi KHK’yî kar ra ameyê dûrvistene’
Guneş Ozel dîyar kerd ke OHAL’î ser o 7 serrî vîyartê la tesîrê ci hema zî dewam kenê û vat: “Demê OHAL’î de 125.612 kesî bi rayîrê KHK’yî kar ra ameyê dûrvistene. Înan ra 4259 kesî girêdayeyê sendîkayanê KESK’î bîyê. Nê îxracan ra pey xeylê kesan cuya xo vîndî kerde. Dima seba tayênan qerarê agêrayîşê karî amey dayene la tu berpirsîyarî nêameyê muhakemekerdene.”
‘Falîyetê sendîkayî suc nîyê’
Guneş Ozel dîyar kerd ke ewro hiqûq binê destê îqtîdarî de yo û nê çîyî vatî: “Tu heqê sendîkayan çin ê. Seba ney ma Amed ra heta Anqara dest bi rayîrşîyayîşî kenê. Ma do waştişanê xo berê Meclîsê Pîl ê Tirkîya û Wezaretê Edaletî. Ma vanê falîyetê sendîkayan suc nîyê.”
Eşkerayî ra pey kesê ke do rayra şêrê ver bi Riha kewtê rayîr.
