Meclîsê Cinîyan ê DEM Partî vera eksêcikerdişê vatişanê sîyasetmedaranê cinî yê kurd û hedefgirewtişê înan de reaskîyon mojna û vat: “Serdemo de ke hêvîya aştî gird bena, bi vatişanê faşîst hedefgirewtişê sîyasetmedaranê cinî, çîyêko tesaduf nîyo.”
Meclîsê Cinîyan ê Partîya Têduştî û Demokrasî ya Şaran (DEM Partî) sere de vatişê Şaredarê Boluyî Tanju Ozcan ke Serekwekîla DEM Partî Gulistan Kiliç Koçyîgîte hedef girewtbî, derheqê hedefgirewtişê sîyasetmedaranê cinî yê kurd de eşkerayîyêka nuştekî daye.
‘Do cinî wayîrvejîyayîşê prosesî ra fek veranêdê’
Eşkerayîya Meclîsê Cinîyan ê DEM Partî de wina ame vatene: “Ê ke bi sûrkerdişê nîjadperestî, cînsîyetperestî û neteweperestî hêrişê sîyasetê ma yê cinî kenê wa baş bizanê ke cinî do derûdorê prosesê Aştî û Komelê Demokratîkî de têhetameyîşî ra fek veranêdê.
Prosesê Aştî de nê vatişê faşîstî tesaduf nîyê
Demêko de ke hêvîya aştî ya cinîyan û şaran vêş bena, tesaduf nîyo ke bi vatişanê faşîst vera sîyasetmedaranê ma yê cinî hêriş yeno kerdene. Ê ke sîyasetê şerî pawenê û bi îdeolojîyanê faşîst ê serdestîya camêrdî hêrişê waştişê aştî yê şaran û cinîyan kenê, ê hêz ê ke hewl danê şaran yewbînan rê bikerê dişmen û tira rant bigîrê.
Nê semedî ra bi destê rayberanê sîyasetê serdestîya camêrd o faşîst, qiseykerdişê sîyasetmedaranê cinî yê aştî ser o eksê înan yeno vatene û hemrayanê ma kenê hedef. Operasyonê xapînayîşî yê bi ziwanê nîjadperestî yenê kerdene, vera komelî û bi taybetî vera cinîyan suc ê.
Ma do bêveng nêmanê
Ma do hemverê nê hêrişan hêvîya aştî ya komelî ser o bêveng nêmendê û ma do nêmanenê zî. Ma do her cayo ke tede yê, uca de têkoşînê xo yê vera faşîzmî xurt bikerê û israrê xo yê aştî bidomnê. Faşîzm nê, têkoşînê aştî yê cinîyan do serkewo.”
