Komelnas û Profesor William I. Robinson seba piştîdayîşê vengdayîşê Rayberê Şarê Kurdî Abdullah Ocalanî mesajêk erşawit û vat: “Abdullah Ocalan, bêmunaqeşe rayberê prosesê aştî yo û aktorêko sereke yo, ganî bêro veradayene.”
Komelnas û Profesorê Unîversîteya Kalîfornîya William I. Robinson Partîya Têduştî û Demokrasî ya Şaran (DEM Partî) rê mesajêk erşawit û piştî daye vengdayîşê Rayberê Şarê Kurdî Abdullah Ocalanî teqez kerd û dîyar kerd ke Abdullah Ocalan seba ameyoxê Tirkîya rolêko sereke kay keno.
Mesajê Robinsonî wina yo:
“Ez na mektube Rayberê Şarê Kurdî Abdullah Ocalan û DEM Partî rê nusena ke piştîdayîşê xo yê prosesê aştî yo Tirkîya de virazîyayo dîyar bikera. Ma serdemê krîzêko xorîn û vurîyayîşanê muhîman ê dinya ravîayrenê. Nê serdemî de tehlukeyê girdî est ê labelê eynî wext de firsendê neweyî zî est ê. Na rewşe ma mecbur kena ke ma reyna bifikiryê ke zafaneyê feqîran û cîyabîyayîşî senî eşkenê têkoşînê xo yê seba azadîye komelê ma yê dinya de aver bero. Tecrubeyê şarê kurdî yo Konfederalîzma Demokratîkî reyde serranê peyênan de no nîşanê ma da.
Îro PKK pêşnîyaz keno ke têkoşînê çekdarî vîyaro têgêrayîşêko komelkî yê aştîyane û sosyalîst. Seba ke no proses aver şêro, ganî çend gamê muhîmî bêrê eştene. Heme çî ra ver, ganî Tirkîya de înîsyatîfêko sîyasî bêro pêardene ke nê vurîyayîşî bikero. Diyîn; ganî têkoşînê kurdan û têkoşînê sînifî yê proletarya seba vurîyayîşê komelkî bibê yew û no têkoşîn warê sîvîlî de bibo seferberîyêko girseyî yê aştîyane. Aştîya raştikên tena bi edeletê komelkî mumkin o
Tewr peyênî de, ganî Abdullah Ocalan ke rayberê prosesê aştî yo û aktorêko sereke yê ameyoxê Tirkîya yo, azad bibo.”
William I. Robinson kam o?
William I. Robinson serra 1959î de ameyo dinya û cigêrayoxêko amerîkajij yo. O xebatanê sîyasî, ekonomî, global, Amerîkaya Latînî û materyalîzmo tarîxî ser o xebitîyeno. Unîversîteya Kalîfornîya de profesorê komelnasîye yo.
