Şaredarîya Amedî ya Şaristanê Girdî, seba ciftanê goşgiranan merasîmanê nîkahî de destegê tercumanîya ziwanê îşaretan o bêpere da destpêkerdene.
Serekîya Daîreya Xizmetanê Astengdar û Pîran, xebatêka newîye Hewteyê Astengdaranê Goşgiranan ê Mîyanneteweyî de dekerd xizmet. Serekîya daîre ke şarê goşgiranan rê desteg dana ke xo îfade bikerê û heqê resnayîşê înan temîn bikero, bi dirûşmeyê “Ganî Her ‘Eya’ Ziwanê Xo de Bibo” ciftanê goşgiranan rê merasîmanê nîkahî de destegê tercumanîya ziwanê îşaretan o bêpere da destpêkerdene.
‘Parçeyê polîtîkaya seypêyî yo’
Derheqê xebate de Mudîrê Şûbeyê Astengdaran ê Serekîya Daîreya Xizmetanê Astengdar û Pîran Emîn Barani agahî da û va ke nê tetbîqî seba ke goşgiranî heqanê xo bixebitnê dekerdî xizmet. Barani wina va: “Bi dirûşmeyê ‘Ganî Her ‘Eya’ Ziwanê Xo de Bibo’, ma sey Şaredarîya Amedî ya Şaristanê Girdî ciftanê goşgiranan rê merasîmanê nîkahî de destegê tercumanê ziwanê îşaretan o bêpere danê. No xizmet, goşgiranan rê îmkan dano ke xo bi ziwanê xo îfade bikerê, heqê resnayîşî û awankerdişê keyeyi bigîrê. No tetbîq ke piştî dano xoserbîyayîşê înan, sey parçeyêk polîtîkaya seypêyî ya şaredarîya ma dekewto xizmet.”
Baranî va ke şarê goşgiranî yê ke wazenê nê xizmetî ra îstîfade bikerê, bi nuştekî muracatê şaredarîye bikerê bes o.
