Înîsîyatîfê Yewîya Demokratîke bi munasebetê 1ê Êlule Roja Aştî ya Dinya eşkerayîyêk weşanaye û vat: “Vengdayîşê Aştî û Komelê Demokratîk ê birêz Abdullah Ocalanî seba heme şaran berê ameyoxêo aştîyane akerdo. Vengdayîşê ma dewlete û hukmatî rê yo ke seba aştîyêka menda wa bi lez gamanê şênberan bierzê.”
Înîsîyatîfê Yewîya Demokratîke bi munasebetê 1ê Êlule Roja Aştî ya Dinya bi sernameyê “1ê Êlule heme şaranê dinya rê pîroz bo!” eşkerayîyêka nuştekî weşanaye.
Înîsîyatîfê Yewîya Demokratîke eşkerayî de dîyar kerd ke destpêkê merdimîye ra heta ewro şer, zilm û zordarî tu wext erdê ser o ra kêm nêbîyê û wina vat: “Reyna têkoşînê aştî zî vera mezgo şerwaştox her tim est bîyo. Hetêk ra pirodayîş û şeranê merdimîye, xoza û kultur rastê hêrişan aöeyo, hetêk ra zî bi hewldayîşanê pêameyîşan berê cuye ameyo akerdene. La hema zî hiş û vîrê xeylê şaran de tesîrê şer û hêrişanê hovaneyan cayê xo girewto û nêameyo xovîrrakerdene. O semed ra şer zaf reyan destê zaliman de bîyo hacetêk û vera demokrasî û azadîye ameyo şuxulnayene.”
‘Muhîmîya aştî bi hewayêko zelal vejeye orte’
Înîsîyatîfê dewamê eşkerayîya xo de wina vat: “86 serrî ra ver 1ê Êlule bi hêrişê Nazîyan ê vera Polonyayî Şero 2. ê Dinya de dest pêkerd, mîyanê 6 serran de 50 mîlyonî ra zafêr kesan cuya xo vîndî kerd. Bêguman encamê nê şerî seba heme merdimîye giran bi la eynê wextî de muhîmîya aştî zî bi hewayêko zelal vejeye orte. O semed ra bi hewayêko trajîk ame tecrubekerdene ke şer û pirodayîşî de kiştiş est o, xirabî û feqirî est a; eksê nê aştî û pêameyîşî de cu, başî û averşîyayîş est o.”
‘Her gama seba aştî do bawerîya aştî hîna geş bikera’
Înîsiyatîfî bale ant vengdayîşê “Aştî û Komelê Demokratîk” ê Rayberê Şarê Kurdî Abdullah Ocalanî ser o û nê çîyî vatî: “Şarê Tirkîya 1ê Êlule emserr bi prosesê Aştî û Komelê Demokratîk pêşwazî kenê. Bêguman hêvîya aştî seba heme şaran cayê keyfweşî yo. O semedî ra Vengdayîşê Aştî û Komelê Demokratîk ê birêz Abdullah Ocalanî seba heme temsîlkar, bawerî û şaran berê ameyoxêko aştîyane akerdo. Vengdayîşê ma Dewlet û Hukmatî rê yo ke seba aştîyêka menda û birûmete bi lez gamanê şênberan bierzê. Her gama seba aştî û demokrasî do bawerîya prosesî hîna geş bikero, her game do biba teqezîya çareserîya demokratîke.”
